ఆత్మహత్యకు యత్నించిన లారీ డ్రైవర్​... కాపాడిన పోలీసులు

అసలే ఆర్థిక ఇబ్బందులు... ఆపై యజమాని జీతం ఇవ్వట్లేదు... మరణమే శరణమనుకున్నాడు ఆ వ్యక్తి. ప్రధాన రహదారి పక్కనే ఉన్న చెట్టుకు చొక్కాతో ఉరేసుకున్నాడు. కానీ... బాటసారుల సమయస్ఫూర్తి... పోలీసుల తక్షణ స్పందనతో... నిండు ప్రాణం నిలబడింది.

ఆత్మహత్య చేసుకోబోతున్న ఓ వ్యక్తి నిండు ప్రాణాన్ని మెదక్​ జిల్లా రామాయంపేట పోలీసులు రక్షించారు. కోమటిపల్లికి చెందిన అనిల్​... లారీడ్రైవర్​గా పనిచేస్తున్నాడు. ఎన్​హెచ్​-44 పక్కన అనిల్... చెట్టుకు చొక్కాతో ఉరేసుకునేందుకు ప్రయత్నించాడు. అదే సమయంలో రహదారి వెంట వెళ్లే వాహనదారులు గమనించి పోలీసులకు సమాచారమిచ్చారు. హుటాహుటిన ఘటనాస్థలిని చేరుకున్న పోలీసులు అనిల్​కు నచ్చజెప్పి కిందకి దింపారు. వెంటనే ఆస్పత్రికి తరలించారు.

లారీ డ్రైవర్​గా పనిచేస్తున్న అనిల్​ ఆర్థిక ఇబ్బందులతోనే ఆత్మహత్యకు యత్నించినట్లు పోలీసులు తెలిపారు. సమస్యలకు తోడు తన యజమాని వేతనం ఇవ్వకుండా సతాయించటం వల్ల తీవ్ర మనస్తాపానికి గురై ఈ నిర్ణయం తీసుకున్నట్లు వెల్లడించారు.

ఏది ఏమైనా.... పోలీసులు వెంటనే స్పందించటం వల్లే నిండు ప్రాణం నిలిచిందని పలువురు ప్రశంసిస్తున్నారు.