కాళేశ్వరం ప్రాజెక్టు, మిషన్‌ కాకతీయలతో రాష్ట్రంలోని చెరువులు నిండుకుండలుగా మారాయని, రాబోయే రోజుల్లో తెలంగాణలో నీలివిప్లవం రాబోతుందని మంత్రి హరీశ్ రావు అన్నారు. గ్రామాభివృద్ధే ధ్యేయంగా, కులవృత్తులకు ప్రోత్సాహం అందిస్తున్నామని తెలిపారు. ఈ నేపథ్యంలోనే మత్స్యకారులకు వందశాతం సబ్సిడీతో చేపపిల్లలను పంపిణీ చేస్తున్నామని మంత్రి వెల్లడించారు.
మెదక్ జిల్లా రామాయంపేట ధర్మారం చెరువులో ఎమ్మెల్యే పద్మాదేవేందర్‌ రెడ్డితో కలిసి చేప పిల్లలను వదిలారు. రాష్ట్ర వ్యాప్తంగా దాదాపు 80 కోట్ల చేప పిల్లల పంపిణీ చేపట్టామని తెలిపారు. మత్స్యకారులు ప్రమాదవశాత్తు మృతి చెందితే వారికి 6 లక్షల రూపాయల ఎక్స్ గ్రేషియా అందచేస్తామని అన్నారు. దళారులను ఆశ్రయించకుండా మత్స్యకారులే సొంతంగా మార్కెటింగ్ చేసుకునేలా చర్యలు చేపడతామని వెల్లడించారు. అనంతరం నూతన గ్రామపంచాయతీ భవనంతో పాటు డంప్‌ యార్డు, వైకుంఠధామాలను మంత్రి హరీశ్‌రావు ప్రారంభించారు.