ఇప్పటి వరకు విదేశాలనుంచి జిల్లాకు వచ్చిన 111 మందిని హోం క్వారంటైన్‌లో ఉంచామని మెదక్ జిల్లా కలెక్టర్ ధర్మారెడ్డి తెలిపారు. వారెవరిలో కరోనా లక్షణాలు లేవని... ప్రజలు ఆందోళన చెందాల్సిన అవసరం లేదని అన్నారు. ప్రభుత్వ ఆదేశాలను ధిక్కరించి బయట తిరిగిన నిజాంపేట వాసులిద్దర్నీ అరెస్టు చేసి ప్రభుత్వం ఏర్పాటు చేసిన కరోనా నిర్బంధ కేంద్రానికి తరలించామని తెలిపారు.
ప్రభుత్వం విధించిన లాక్‌డౌన్‌కు అందరూ సహకరించాలని కోరారు. ఉదయం 6 గంటల నుంచి సాయంత్రం 6 గంటల వరకు అన్ని రకాల దుకాణాలు తెరిచి ఉంటాయన్నారు. రాత్రి 7నుంచి ఉదయం 6గంటల వరకు కర్ఫ్యూ ఉంటుందని... ఆ సమయంలో బయటకు తిరగడానికి అనుమతి లేదని తెలిపారు. నిబంధనల్ని అతిక్రమిస్తే కఠిన చర్యలు తీసుకుంటామని హెచ్చరించారు.