వ్యవసాయ భూమిని రిజిస్ట్రేషన్ చేసుకునేందుకు ఎన్వోసీ ఇవ్వడానికి దరఖాస్తుదారు నుంచి రూ. 1.12 కోట్లు తీసుకున్న మెదక్ అదనపు కలెక్టర్ నగేష్ను ఏసీబీ అధికారులు అరెస్టు చేశారు. ఈ కేసులో చెరో లక్ష రూపాయలు లంచం తీసుకున్న నర్సాపూర్ ఆర్డీవో అరుణ రెడ్డి, తహశీల్దార్ అబ్దుల్ సత్తార్తోపాటు జూనియర్ అసిస్టెంట్ వసీం, నగేష్కు బినామీగా వ్యవహరిస్తున్న జీవన్ గౌడ్ను అవినీతి నిరోధక శాఖ అధికారులు అరెస్టు చేశారు. వీరిని హైదరాబాదులోని ప్రత్యేక న్యాయస్థానంలో హాజరు పరుచనున్నారు.
ఇప్పటికే అధికారులు అదనపు కలెక్టర్ నగేష్, ఆర్డీవో అరుణ రెడ్డి ఇళ్లు, కార్యాలయాల్లో సోదాలు చేశారు. నగేష్ క్యాంపు కార్యాలయంలో పలు కీలక పత్రాలు స్వాధీనం చేసుకున్నారు. కొంపల్లిలోని నగేష్ నివాసంలో బ్యాంకు లాకర్ తాళంచెవి స్వాధీనం చేసుకున్నారు. బోయిన్పల్లిలోని ఆంధ్రాబ్యాంకులో లాకర్ ఖాతా ఉన్నట్లు గుర్తించి దాన్ని తాత్కాలికంగా జప్తు చేయాల్సిందిగా బ్యాంకు అధికారులకు లేఖ రాశారు. ఆర్డీవో అరుణ రెడ్డికి చెందిన ఘట్కేసర్ నివాసంలో అధికారులు సోదాలు చేసి రూ.28 లక్షల నగదు, అరకిలో బంగారం స్వాధీనం చేసుకున్నారు.
శేరిలింగంపల్లికి చెందిన లింగమూర్తి నర్సాపూర్ మండలం చిప్పల్తుర్తిలో ఈ ఏడాది ఫిబ్రవరిలో 112 ఎకరాల భూమిని కొనుగోలు చేశాడు. రెవెన్యూ రికార్డుల్లో 22a కింద ఉన్న ఈ భూమిని నిషేధిత జాబితా ప్రకారం రిజిస్ట్రేషన్ శాఖ అధికారులు రికార్డుల్లో నమోదు చేయలేదు. రెవెన్యూ శాఖ అధికారుల నుంచి ఎన్ఓసి తీసుకురావాలని సూచించగా.. లింగమూర్తి జులైలో నర్సాపూర్ తహశీల్దార్ అబ్దుల్ సత్తార్కు దరఖాస్తు చేసుకున్నాడు. అతను ఆ దరఖాస్తును నర్సాపూర్ ఆర్డీవోకు పంపగా.. అక్కడినుంచి ఆ దస్త్రం అదనపు కలెక్టర్ నగేష్ వద్దకు చేరింది. ఎన్వోసీ ఇవ్వడానికి ఎకరానికి లక్ష చొప్పున కోటి 12 లక్షలు ఇవ్వాలని అదనపు కలెక్టర్ నగేష్ డిమాండ్ చేశారు. ఈ మేరకు లింగమూర్తి జులైలో 19.5 లక్షలు.. ఆగస్టులో 20.5 లక్షలు అదనవు కలెక్టర్ నగేష్కు చెల్లించాడు. మరో 72 లక్షలు చెల్లించాల్సి ఉండగా తన వద్ద నగదు లేకపోవడం వల్ల ఐదెకరాల భూమిని అగ్రిమెంట్ చేశాడు. అదనపు కలెక్టర్ నగేష్ తన బినామీ అయిన జీవన్ గౌడ్ పేరు మీద ఆ ఐదెకరాల భూమిని అగ్రిమెంట్ చేయించాడు. భూమి రిజిస్ట్రేషన్ చేసేంతవరకు జామీనుగా లింగమూర్తి నుంచి ఎనిమిది ఖాళీ చెక్కులను అదనపు కలెక్టర్ నగేష్ తీసుకున్నాడు.