'కాళేశ్వరం తర్వాత పర్యాటక కేంద్రంగా ఎల్లంపల్లి ప్రాజెక్టు'

ఎల్లంపల్లి ప్రాజెక్టును పర్యాటక కేంద్రంగా తీర్చిదిద్దేందుకు కృషి చేస్తామని రాష్ట్ర పర్యాటక అభివృద్ధి సంస్థ ఛైర్మన్​ ఉప్పల శ్రీనివాస్​ అన్నారు. పేద, మధ్య తరగతి ప్రజలు ఇక్కడ ఆహ్లాదాన్ని పొందేందుకు అన్ని ఏర్పాట్లు చేస్తున్నట్లు చెప్పారు. మంచిర్యాల ఎమ్మెల్యే దివాకర్​రావుతో కలిసి ప్రాజెక్టును సందర్శించారు.

మంచిర్యాల జిల్లాలోని శ్రీ పాద ఎల్లంపల్లి జలాశయాన్ని రాష్ట్ర పర్యాటక అభివృద్ధి సంస్థ ఛైర్మన్ ఉప్పల శ్రీనివాస్, ఎమ్మెల్యే దివాకర్ రావు సందర్శించారు. ఎల్లంపల్లి ప్రాజెక్టును పర్యాటక ప్రాంతంగా తీర్చిదిద్దేందుకు అన్ని ఏర్పాట్లు చేస్తున్నట్లు తెలిపారు. రాష్ట్రంలో కాళేశ్వరం ప్రాజెక్టు తర్వాత ఎల్లంపల్లి జలాశయం వద్ద సందర్శకుల తాకిడి అధికంగా ఉంటుందని ఉప్పల శ్రీనివాస్ అన్నారు.

అంతర్జాతీయంగా గుర్తింపు పొందేలా

తెలంగాణలో పర్యాటక వనరులు అధికంగా ఉన్నాయని.. వాటికి మౌలిక సదుపాయాలు కల్పించి అభివృద్ధి పరిస్తే అంతర్జాతీయంగా నిలిచిపోతాయని పేర్కొన్నారు. అతి త్వరలోనే 100 మంది ప్రయాణించేలా డబుల్ డెక్కర్ బోట్​ను ఏర్పాటు చేయనున్నట్లు చెప్పారు.

బడ్జెట్​ హోటల్​

ఎమ్మెల్యే సహాయ నిధి నుంచి పేద, మధ్యతరగతి ప్రజల కోసం బడ్జెట్ హోటల్​ను ఏర్పాటు చేయనున్నట్లు శ్రీనివాస్​ వెల్లడించారు. చిన్న పిల్లలు, యువత కోసం గేమింగ్ జోన్, అడ్వాంటేజ్ పార్కుల కోసం పది ఎకరాల స్థలం సేకరించనున్నట్లు వివరించారు. ప్రత్యేక రాష్ట్రం ఏర్పడిన తర్వాత ముఖ్యమంత్రి కేసీఆర్.. పర్యాటక రంగంపై శ్రద్ధ కనబరుస్తున్నారని పేర్కొన్నారు.

ఇదీ చదవండి:సీఎం కేసీఆర్​ కృషితో దేవాలయాల అభివృద్ధి: ఇంద్రకరణ్ రెడ్డి