'కొనుగోలు భద్రత ఉన్న ఏకైక పంట పామాయిలే'

దేశంలో పంట కొనుగోలుకు భద్రత ఉన్న ఏకైక పంట పామాయిలేనని రాష్ట్ర వ్యవసాయ శాఖ మంత్రి నిరంజన్​ రెడ్డి అన్నారు. ఈ మేరకు మంచిర్యాల జిల్లా కత్తెరశాల గ్రామంలోని పామాయిల్​ తోటను ఆయన పరిశీలించారు.

తెలంగాణ రాష్ట్రం ఎర్పడినప్పటి నుంచి ముఖ్యమంత్రి కేసీఆర్ వ్యవసాయ రంగాన్ని అభివృద్ధి చేసేందుకే కృషి చేస్తున్నారని రాష్ట్ర వ్యవసాయ, మార్కెటింగ్ శాఖ మంత్రి నిరంజన్ రెడ్డి అన్నారు. మంచిర్యాల జిల్లా చెన్నూర్ మండలం కత్తెరశాల గ్రామంలోని వైస్​ ఎంపీపీ బాపు రెడ్డికి చెందిన పామాయిల్​ తోటను ప్రభుత్వ విప్, చెన్నూర్ ఎమ్మెల్యే బాల్క సుమన్, ఎమ్మెల్సీ పురాణం సతీష్​లతో కలిసి ఆయన పరిశీలించారు.

మెరుగైన దిగుబడి సాధించేందుకు పంట మార్పిడి పద్ధతి అనివార్యమని నిరంజన్ రెడ్డి ​ అన్నారు. శాస్త్రవేత్తలు కూడా పంట మార్పిడి పద్ధతినే సూచిస్తున్నారని ఆయన స్పష్టం చేశారు. పామాయిల్​ పంటను ఒకసారి సాగు చేస్తే నాలుగేళ్లకు మొదలై 30 ఏళ్ల వరకు దిగుబడి వస్తుందని పేర్కొన్నారు. సంప్రదాయ పంటల సాగు నుంచి రైతులు బయటకు రావాలని మంత్రి పిలుపునిచ్చారు.

ఇదీ చదవండి:'వేగాన్ని నియంత్రించినప్పుడే ప్రమాదాలు నివారించగలం'