డంపింగ్ యార్డులా మారిన గోదావరి నది పవిత్ర గోదావరి నది ఇప్పుడు కలుషితమవుతోంది. గోదావరి నీటిలో బ్యాక్టీరియా, ప్రమాదకర రసాయనాలు రోజురోజుకీ పెరిగిపోతున్నాయి. మంచిర్యాల పురపాలక సంఘం పరిధిలో చెత్త డంపు యార్డుకు స్థలం కేటాయించకపోవడం వల్ల మున్సిపాల్టీ అధికారులు గోదావరినది పరివాహక ప్రాంతాన్నే డంపు యార్డు కింద మార్చేశారు. మున్సిపాల్టీ అధికారుల ఆదేశంతో సిబ్బంది.. ఆస్పత్రుల నుంచి సేకరించిన ప్రమాదకర వ్యర్థాలను గోదావరి ఒడ్డున పడేస్తున్నారు. ఒడ్డుకు వెళ్లినవారికి చెత్తా చెదారాలతో కుళ్లిన వాసన వస్తోంది. సీస ముక్కలు వంటివి గుచ్చుకుంటున్నాయి. ప్రభుత్వం నదీ జలాల పరిరక్షణకు సంబంధించి కనీస చర్యలు చేపట్టడం లేదని స్థానికులు విమర్శిస్తున్నారు.
పురపాలక సిబ్బంది కాళేశ్వరం జలాలు రాకముందు తొలగించాల్సిన చెత్తను నీరు వచ్చిన తర్వాత జేసీబీల సాయంతో తీస్తున్నారని స్థానికులు మండిపడుతున్నారు. గోదావరి నీటిని ఎంతో పవిత్రంగా భావించే ఇక్కడి ప్రజలకు.. పాలకులు, పురపాలక అధికారులు చేస్తున్న నిర్లక్ష్యం ఆందోళన చెందేలా చేస్తున్నది. శ్రావణమాసంలో గోదావరికి పెద్ద ఎత్తున తరలివచ్చి పుణ్యస్నానం ఆచరించే భక్తులు ఇక్కడి పరిస్థితిని చూసి నిరాశ చెందుతున్నారు.
