Water plants Business: మిషన్ భగీరథ ద్వారా పల్లెపట్టణాల్లో ఇంటింటికీ తాగునీరు అందిస్తున్నామని... రాష్ట్ర ప్రభుత్వం చెబుతున్నా మహబూబ్ నగర్ జిల్లాలో మున్సిపాలిటీలు, గ్రామాల్లో ప్రైవేటు నీటి వ్యాపారం జోరుగా సాగుతోంది. పట్టణంలోనే 100కు పైగా అనధికారిక ఆర్వో ప్లాంట్లున్నాయి. ప్లాంట్ల నుంచి ఉత్పత్తి చేసే నీటిని వాహనాల ద్వారా, వీధుల్లో ఏర్పాటు చేసిన 5 రూపాయల ప్లాంట్ల ద్వారా జనం కొనుగోలు చేసి తాగుతున్నారు. ఇంత జరుగుతున్నా నిబంధనల మేరకు నీళ్లందిస్తున్నారా అంటే అదీ లేదు. నీటి శుద్ధి ప్రక్రియ ఇష్టానుసారం నిర్వహిస్తున్నారు. వచ్చేవి నిజంగానే శుద్ధి చేసిన నీళ్లో కాదో జనానికి తెలియకుండా పోతోంది. డబ్బులు చెల్లించి తీసుకోవడం తప్ప జనం ఏమీ చేయలేకపోతున్నారు. నీటిని ఎక్కడ శుద్ధి చేస్తారు.. ఎలా శుద్ధి చేస్తారు.. ఆ నీళ్లు తాగేందుకు సురక్షితమా అన్న అంశాల్ని ధ్రువీకరించే దిక్కే లేదు. రుచి కోసం కొన్నిరకాల రసాయనాల్ని కలిపి.. నీటికి తీపిదనం వచ్చేలా చేస్తున్నారన్నా ఆరోపణలున్నాయి.
"నిజంగా ఆర్వో వాటర్ అనేది నిర్జీవ జలం. అందులో ఎలాంటి లవణాలు ఉండవు. ఈ లవణాలు లేకపోవడం వల్ల పీహెచ్ విలువ తగ్గి ఎసిడిటీ పెరుగుతుంది. మామూలుగా 6.5 నుంచి 8.5 వరకు పీహెచ్ విలువ ఉండాలి. కానీ ఆర్వో నీటిలో అంత ఉండదు. కాల్షియం అనేది మనకు చాలా అవసరం. ఎముకల పెరుగుదలకు, చిన్నపిల్లల ఎదుగుదలకు చాలా అవసరం. లవణాలు మానవునికి ఎంతో అవసరం కనుక సమపాళ్లలో వాటిని నీటి ద్వారా పంపిణీ చేయడం జరగుతుంది." -పకీర్‌, మిషన్ భగీరథ ఏఈ, మహబూబ్‌నగర్‌ రూరల్‌ మండలం
అధికారులు విఫలం:మిషన్ భగీరథ నీళ్లు అందుబాటులో ఉన్నా ప్రైవేటు నీటి వ్యాపారం జోరుగా సాగేందుకు అనేక కారణాలున్నాయి. ఆర్వో ప్లాంట్ల నీళ్లు సురక్షితం కాదని చెబుతున్న మిషన భగీరథ అధికారులు.. భగీరథ నీరు సురక్షితమని జనాల నమ్మకం చూరగొనడంలో దారుణంగా విఫలమవుతున్నారు. తరచూ లీకేజీలు, మరమ్మతులకు గురికావడంతో ప్రజలు ప్రైవేటు ప్లాంట్లనే నమ్ముకుంటున్నారు. ఆర్వో ప్లాంట్ల నీటి వ్యాపారంపై మహబూబ్ నగర్ జిల్లా మిషన్ భగీరథ అధికారులను వివరణ కోరగా.. గ్రామాల్లో ప్రైవేటు ప్లాంట్లను గుర్తించామని, వాటిని మూసివేసేలా మిషన్ భగీరథ నీటిని సరఫరా చేయాలని ఉన్నతాధికారుల నుంచి ఆదేశాలున్నట్లు చెప్పారు. మున్సిపల్ అధికారులు మాత్రం నిబంధనలకు విరుద్ధంగా నడిచే ప్లాంట్లపై ఆహారకల్తీ అధికారులే చర్యలు తీసుకోవాలని చెప్పారు.