ఒక్క లారీతో జాతీయ రహదారిపై ట్రాఫిక్ జామ్

అసలే ట్రాఫిక్ రద్దీ... అది చాలదన్నట్లు ఆ ఇరుకైన రహదారిలో భారీ లారీ నిలిచిపోయింది. రెండు జిల్లాలను కలుపుతూ వెళ్లే జాతీయ రహదారిపై లారీ అడ్డుగా ఉన్నందున అక్కడి నుంచి ఒక్క వాహనం కూడా ముందుకు తీసుకెళ్లలేకపోతున్నారు.

మహబూబ్ నగర్ జిల్లా దేవరకద్ర నియోజకవర్గ కేంద్రంలో ఆర్​ఓబీ నిర్మాణం పనులు కొనసాగుతున్నాయి. వంతెన కోసం సిమెంట్ పిల్లర్ల కోసం భారీస్థాయిలో నడిరోడ్డుపై గుంతలు తీసి సిమెంట్ దిమ్మెల నిర్మాణం చేపట్టారు. ఆ పక్క నుంచి 167 జాతీయ రహదారిపై వాహనాల రాకపోకలు కొనసాగుతున్నాయి. ఇరుకైన రహదారిలో ఓ భారీ వాహనం మధ్యలో నిలిచిపోయింది. లారీ అడ్డుగా ఉన్నందున అరగంట పాటు జాతీయ రహదారిపై వాహనాల రాకపోకలు స్తంభించాయి. విషయం తెలుసుకున్న పోలీసులు యువకుల సాయంతో వాహనాన్ని అక్కడినుంచి తొలగించే ప్రయత్నం చేశారు. ప్రయత్నం విఫలం కావడం వల్ల క్రేన్​ని రప్పించారు. లారీకి గొలుసులు కట్టి క్రేన్ సాయంతో దానిని తొలగించారు.

ఇవీ చూడండి: ఆర్టీసీ కార్మికులతో చర్చల ప్రసక్తి లేదనడం సరికాదు: రాఘవులు