'ఎస్సీ, ఎస్టీ కమిషన్ హక్కులను సద్వినియోగం చేసుకోవాలి'

మహబూబ్​నగర్​ జిల్లా గోపన్​పల్లి గ్రామాన్ని రాష్ట్ర ఎస్సీ, ఎస్టీ కమిషన్​ ఛైర్మన్​ ఎర్రోళ్ల శ్రీనివాస్​ సందర్శించారు. ఎస్సీల బస్తీలో పర్యటించి.. పలు సమస్యల వివరాలు తెలుసుకున్నారు. కలెక్టర్​ సమక్షంలో సమస్యలకు అక్కడికక్కడే పరిష్కారం చూపారు.

మహబూబ్​నగర్ జిల్లా దేవరకద్ర మండలంలోని గోపన్​పల్లి గ్రామంలో రాష్ట్ర ఎస్సీ, ఎస్టీ కమిషన్ ఛైర్మన్ ఎర్రోళ్ల శ్రీనివాస్​ పర్యటించారు. 72 కుటుంబాలు ఉన్న ఎస్సీల బస్తీని సందర్శించి.. అక్కడున్న అంబేడ్కర్, గాంధీజీ విగ్రహాలకు పూలమాలలు వేసి నివాళులర్పించారు. అనంతరం స్థానిక ప్రభుత్వ ఉన్నత పాఠశాలలో ఏర్పాటు చేసిన సమావేశంలో ఆయన పాల్గొన్నారు. ఈ సందర్భంగా పలువురు లబ్ధిదారులకు రెండు పడక గదులను మంజూరు చేశారు. ఎస్సీ వాడలో పెండింగ్​లో ఉన్న వంద మీటర్ల మురుగు కాలువ నిర్మాణాన్ని త్వరితగతిన చేపట్టాలని, సామాజిక భవనం ఏర్పాటు చేయాలని జిల్లా కలెక్టర్​ వెంకట్రావును ఆదేశించారు. ఛైర్మన్ ఆదేశాలతో సామూహిక భవనానికి, పెండింగ్ పనులను వెంటనే పూర్తి చేసేందుకు జిల్లా కలెక్టర్ నిధులను మంజూరు చేశారు.

రాజ్యాంగం ద్వారా కల్పించిన ఎస్సీ, ఎస్టీ కమిషన్ హక్కులను సద్వినియోగం చేసుకోవాలని శ్రీనివాస్​ సూచించారు. కమిషన్​పై వార్డు మెంబర్ల నుంచి జిల్లా పరిషత్ ఛైర్మన్​ల వరకు అన్ని విభాగాల వారికి అవగాహన కల్పిస్తామని తెలిపారు. అనంతరం స్థానిక ప్రజా ప్రతినిధులు, అధికారులతో కలిసి సహపంక్తి భోజనం చేశారు. కార్యక్రమంలో కమిషన్​ సభ్యులు రాంపాల్ నాయక్, నీలాదేవి, విద్యాసాగర్, జిల్లా కలెక్టర్ వెంకట్రావు, జిల్లా పరిషత్ ఛైర్మన్ స్వర్ణ సుధాకర్ రెడ్డి, ఎంపీపీ రమాదేవి, సర్పంచ్ రజిత, ఎంపీటీసీ సభ్యులు ఆంజనేయులు, ఉప సర్పంచ్ అరుణ, తదితరులు పాల్గొన్నారు.

ఇదీ చూడండి:కొత్త పీసీసీ అధ్యక్షుడి ఎంపికపై కోర్ కమిటీ సమావేశం