కొవిడ్ నిబంధనలు పాటిస్తూ పాఠశాలలు తెరిచిన విద్యాశాఖ... నిర్వాహణలో ఎదురవుతున్న ఇబ్బందులను మాత్రం పట్టించుకోవడం లేదు. వందల సంఖ్యలో విద్యార్థులుండే ఉన్నత పాఠశాలల్లో.. స్వీపర్లు, స్కావెంజర్లు, అటెండర్లు లేక విద్యార్థులు, ఉపాధ్యాయులు ఇబ్బందులు ఎదుర్కొంటున్నారు. ఉమ్మడి పాలమూరు జిల్లాలోని ప్రభుత్వం ఉన్నత పాఠశాలల్లో ఈ దుస్థితి నెలకొంది. సెప్టెంబర్ 1 నుంచి బళ్లు ప్రారంభమయ్యాయి. వాటి పారిశుద్ధ్య బాధ్యతల్ని స్థానిక సంస్థలకు ప్రభుత్వం అప్పగించింది. మున్సిపాలిటీ, గ్రామపంచాయతీ సిబ్బందే బళ్లను శుభ్రం చేయాలని ఆదేశాలు జారీ చేసింది. తొలినాళ్లలో కాస్త దృష్టి పెట్టిన పారిశుద్ధ్య సిబ్బంది ఆ తర్వాత పట్టించుకోవడం మానేశారు. వారానికి ఒకటి రెండు రోజులు, కొన్నిచోట్ల నెలలో ఒకటి రెండు రోజులు వెళ్లి పాఠశాలలను శుభ్రం చేస్తున్నారు. పరిసరాలను, గదులు ఊడుస్తున్నా.. మూత్రశాలలు, మరుగుదొడ్లు శుభ్రం చేయడం లేదు. వందల సంఖ్యలో విద్యాద్థులుండే బళ్లల్లో అవి కంపు కొడుతున్నాయి. భరించలేక.. ఉపాధ్యాయులే తలా కొంత డబ్బులు వేసుకుని స్కావెంజర్లను, స్వీపర్లను నియమించుకుని శుభ్రం చేయిస్తున్నారు.
సార్లపైనే భారం..
గతంలో 100మంది విద్యార్థులకొక స్కావెంజర్ను నియమించి ఒక్కొక్కరికి రెండున్నర వేలు చెల్లించేవారు. ప్రస్తుతం స్కావెంజర్లు లేక విద్యార్థుల కోసం నిర్మించిన మరుగుదొడ్లు, మూత్రశాలలు కంపుకొడుతున్నాయి. స్థానిక సంస్థల సిబ్బంది వాటి జోలికి వెళ్లడం లేదు. ఇక స్వీపర్లు, అటెండర్లు కూడా లేక గదుల శుభ్రత, పరిసరాల శుభ్రత, పాఠశాల నిర్వాహణ కూడా ఉపాధ్యాయులకు భారంగా మారుతోంది. ఉపాధ్యాయులు సొంత డబ్బులు వేసుకుని ఇచ్చే కొద్దివేతనం వారికి సరిపోవడం లేదు. ఒకటి రెండు నెలలంటే సర్దుబాటు చేస్తాం గాని.. నెలల తరబడి కష్టమంటున్నారు. ఇక కొవిడ్ నిబంధనల అమలు కోసం శానిటైజర్లు, మాస్కులు అందుబాటులో ఉంచాల్సివస్తోంది. వీటికి ప్రత్యేకంగా ప్రభుత్వం నిధుల కేటాయించలేదు. ఉన్న కాంటెంజెన్సీ నిధుల నుంచే వాడుకోవాలని సూచిస్తోంది. ఇవి కాకుండా కాకుండా.. గదుల కొరత, ఉపాధ్యాయుల కొరత.. కనీస వసతుల లేమి.. సర్కారు బళ్లను వేధిస్తున్నాయి. విద్యావాలంటీర్లను సైతం విధుల్లోకి తీసుకోలేదు.