Paddy Procurement Amount Delay : ఓ సారూ.. ధాన్యం డబ్బులు చెల్లించండయ్యా..!

Paddy Procurement Amount Delay in Telangana : అకాల వర్షాలు.. మిల్లర్ల షరతులు ఇలా అన్ని ఇబ్బందులను ఎదుర్కొని ఎట్టకేలకు రైతులు ధాన్యాన్ని అమ్మారు. ధాన్యం అమ్ముడుపోయిందని సంతోషపడ్డ రైతుల సంబురం క్షణాలు కూడా నిలవలేదు. మరో ఇబ్బంది వారిని గందరగోళానికి గురి చేస్తోంది. కొనుగోళ్లు జరిపిన ప్రభుత్వం ధాన్యం డబ్బులు చెల్లించడంలో జాప్యం చేస్తుండటంతో కర్షకులు వానాకాలం పంట వేయడానికి పైకం లేక అవస్థలు పడుతున్నారు.

Delay in Telangana Paddy Procurement Amount :అకాల వర్షాలు.... మిల్లర్ల కొర్రీలు..... తాలు పేరిట తూకాల్లో కోతలు..... అన్ని అడ్డంకులు దాటుకుని సర్కారుకు ధాన్యం అమ్మిన రైతులకు ఆఖరికి చుక్కెదురవుతోంది. ధాన్యం అమ్మి నెలరోజులు గడుస్తున్నా ఇప్పటికీ డబ్బులు ఖాతాల్లో జమ కాలేదు. ఓవైపు యాసంగి సాగు కోసం చేసిన అప్పులు తీరక మరోవైపు వానాకాలం పంటల కోసం పెట్టుబడులకు పైకం లేక అన్నదాతలు ఆందోళనకు గురవుతున్నారు. ఉమ్మడి పాలమూరు జిల్లాలో ధాన్యం డబ్బులు అందక రైతులు ఎదుర్కొంటున్న ఇబ్బందులపై కథనం.

Paddy Procurement Amount Delay in Telangana :యాసంగి సీజన్‌లో వరి పండించిన రైతుల కష్టాలు అన్నీఇన్నీకావు. ఆరుగాలం శ్రమించి పంటపండించడం ఒక ఎత్తైతే, పండించిన పంటను అమ్ముకోవడం, అకాల వర్షాలకు ధాన్యాన్ని కాపాడుకోవడం రైతులకు ఎక్కడలేని ఇబ్బందుల్ని తెచ్చిపెట్టింది. కొనుగోళ్లు మొదలు కాక, మొదలైనా వాటిని తీసుకెళ్లడానికి లారీలు లేకా ఇలా రైతన్నలు పడిన ఇబ్బందులు చిన్నవి కావు. అకాల వర్షాల కారణంగా ధాన్యం కొనేటప్పుడు మిల్లర్లు వాటి తేమ శాతం వంక చూపించి తరుగు ఎక్కువ తీశారు. అలా కూడా రైతులు నష్టాన్ని భరించారు.

Payments Delay to Telangana paddy farmers : అన్నిరకాల కష్టనష్టాలకు ఓర్చి, వ్యయప్రయాసలు భరించి తీరా పంట అమ్ముకుంటే రావాల్సిన డబ్బులు కూడా సకాలంలో రాక అన్నదాతలో అరిగోస పడుతున్నారు. ధాన్యం అమ్మి నెల రోజులకు పైగా గడుస్తున్నా ఇప్పటికి డబ్బులు అందక రైతులు ఇబ్బందులకు గురవుతున్నారు.

'కొనుగోళ్ల కేంద్రాల దగ్గరికి వెళ్లిన తర్వాత క్వింటాకు 10 కిలోల చొప్పున తరుగు తీశారు. ఎలాగో అలా.. ధాన్యం కొనుగోలు పూర్తైంది. ఇక ఇప్పుడు ధాన్యం అమ్మి నెల కావొస్తున్నా పైసల జాడ లేదు. ఇన్నాళ్లూ ఓ బాధ.. ఇప్పుడు మరో తంటా. యాసంగి పంట కోసం తీసుకున్న అప్పులు చెల్లించడానికి చేతిలో చిల్లిగవ్వ లేదు. ఇప్పుడు వానా కాలం పంట వేయడానికి పైసా లేదు. సర్కారేమో ఇప్పటికీ మా డబ్బు చెల్లించడం లేదు. ఇలాగైతే మేం సాగు చేసేదెలా' - బాధిత రైతులు

వానాకాలం రానే వచ్చింది. జూన్ మాసంలో ఖరీఫ్ సీజన్ సైతం ప్రారంభం కానుంది. గతంలో సాగు కోసం చేసిన అప్పులు తీర్చడంతో పాటు.. వానాకాలం పంటలకు సైతం పెట్టుబడులు అవసరమవుతాయి. ఈ తరుణంలా రావాల్సిన డబ్బులు సకాలంలో అందకపోవడంపై రైతులు తీవ్ర అసంతృప్తి వ్యక్తం చేస్తున్నారు. అప్పులు తీసుకుందాం అన్న పాత బాకీలు చెల్లించనిదే కొత్త బాకీలు పుట్టవు.ఇంకా డబ్బులు జమ కాకపోయే సరికి రైతులు ఆందోళన చెందుతున్నారు.

ఎక్కడ అమ్మినా ఏం లాభం:ప్రైవేటులో అమ్మినా, ప్రభుత్వ కొనుగోలు కేంద్రాల వద్ద అమ్మినా.. ఆలస్యంగానే డబ్బులు వస్తున్నాయని, సర్కారుకు అమ్ముకుంటే ఏం లాభమని ప్రశ్నిస్తున్నారు. కాగా ప్రతి గింజ ప్రభుత్వమే కొంటుందని హామీ ఇచ్చి ఇప్పుడు కొనుగోళ్లు మొత్తం పూర్తి అయ్యాక డబ్బులు ఇంకా రాలేదని అన్నదాతలు ఆవేదన వ్యక్తం చేస్తున్నారు.

'యాసంగి పంట కొనుగోళ్ల కోసం 2,214 కేంద్రాలను ఏర్పాటు చేశాం. అన్నింటిలో కొనుగోళ్లు జరుగుతున్నాయి. ఈ వారంలో రోజుల్లో డబ్బులు చెల్లించడం జరుతుంది.' -బాలరాజు, పౌర సరఫరాల సంస్థ జిల్లా మేనేజర్, నాగర్ కర్నూల్

రైతులకు డబ్బుల చెల్లింపుల విషయంలో జాప్యం జరిగిన మాట వాస్తవమేనని అధికారులు చెబుతున్నారు. ఇప్పటి వరకూ ధాన్యం అమ్మిన రైతులకు మరో వారంలో పూర్తిస్థాయిలో చెల్లింపులు చేస్తామని చెబుతున్నారు. రైతులు అమ్మిన ధాన్యానికి మిల్లర్ల తూకం నిర్ణయించిన తర్వాత ఆ సమాచారాన్ని ఆన్​లైన్ లో నిక్షిప్తం చేసే ప్రక్రియ ఆలస్యమవుతున్నట్లు తెలుస్తోంది. వానలు కురిసే సమయం ఆసన్నమైన తరుణంలో ఈ ప్రక్రియను మరింత వేగవంతం చేయాలని రైతులు కోరుతున్నారు.

ఇవీ చదవండి: