సమాజం నుంచి ఎంతో తీసుకుంటున్నాం.. ఎంతో కొంత తిరిగివ్వాలి: శ్రీనివాస్​గౌడ్​

సమాజం నుంచి ఎంతో తీసుకుంటున్న మనం.. సమాజానికి తిరిగి ఎంతో కొంత తిరిగివ్వాల్సిన అవసరం ఉందని మంత్రి శ్రీనివాస్‌ గౌడ్ పేర్కొన్నారు. మహబూబ్‌నగర్‌ జిల్లా జనరల్‌ ఆసుపత్రిలో నిత్యాన్నదాన కార్యక్రమంతో పాటు.. గిఫ్ట్​ ఏ స్మైల్​లో భాగంగా 7 అంబులెన్స్‌లను ఆయన ప్రారంభించారు.

నిస్వార్థంగా సమాజానికి సేవ చేసిన వారు ప్రజల మనుస్సులో శాశ్వతంగా గుర్తుండిపోతారని ఆబ్కారీ శాఖ మంత్రి శ్రీనివాస్‌ గౌడ్‌ పేర్కొన్నారు. మహబూబ్‌నగర్ జిల్లా కేంద్రంలో పలు అభివృద్ధి కార్యక్రమాల్లో పాల్గొన్నారు. ఈ సందర్భంగా సావరిన్ ఫౌండేషన్, నేను సైతం ఆధ్వర్యంలో ఏర్పాటు చేసిన నిత్యాన్నదాన కార్యక్రమాన్ని ప్రారంభించారు. మహబూబ్​నగర్ జిల్లా ఆసుపత్రికి వచ్చే రోగుల కోసం గతంలో అక్షయ పాత్ర ఫౌండేషన్ సహకారంతో ఆహారం అందించామని..... ఇప్పుడు సావరిన్ పౌండేషన్, నేను సైతం సంస్థలు నిత్యాన్నదానానికి ముందుకు రావడం అభినందనీయమన్నారు. ఈ సందర్భంగా ఎమ్​ఎస్​ఎన్​ లేబొరేటరీస్ ఆధ్వర్యంలో గిఫ్ట్ ఏ స్మైల్ కింద అందించిన 7 అంబులెన్స్ వాహనాలను ఎంపీ మన్నే శ్రీనివాస్​రెడ్డితో కలిసి లాంఛనంగా ప్రారంభించారు.

అనంతరం జిల్లా పరిషత్‌ సమావేశ మందిరంలో వీరన్నపేటకు చెందిన రెండు పడక గదుల ఇళ్ల పట్టాలను లబ్ధిదారులకు అందజేశారు. డబుల్​బెడ్​రూం ఇళ్ల విషయంలో ఎవరైనా డబ్బులు డిమాండ్ చేస్తే నేరుగా అధికారులకు సమాచారం అందించాలని సూచించారు. ఈ సందర్భంగా పట్టణంలోని వానగుట్ట వద్ద సత్యసాయి సేవా సమితి ఆధ్వర్యంలో నిర్మించిన నూతన కల్యాణ మండపాన్ని ప్రారంభించి.. ప్రత్యేక పూజలు చేశారు.