'కొత్త ఏడాదిలో పట్టణ ప్రజలకు ప్రతిరోజు తాగునీరు'

మహబూబ్​నగర్​ పురపాలికలో నూతన సంవత్సర కానుకగా ప్రతిరోజు తాగునీరు అందిస్తామని రాష్ట్ర పర్యాటక శాఖ మంత్రి శ్రీనివాస్ గౌడ్ తెలిపారు. భవిష్యత్తులో పట్టణాన్ని మరింత అభివృద్ధి చేస్తామని అన్నారు. పాలమూరుకు మరో జాతీయ రహదారి మంజూరైందని మంత్రి వెల్లడించారు.

కొత్త ఏడాదిలో మహబూబ్​నగర్​ పట్టణ ప్రజలకు ప్రతిరోజు తాగునీరు అందిస్తామని మంత్రి శ్రీనివాస్​ గౌడ్​ తెలిపారు. గతంలో వారానికోసారి తాగునీరు అందేదని ఆయన అన్నారు. జిల్లా రెవెన్యూ సమావేశ మందిరంలో నిర్వహించిన సభకు మంత్రి హాజరయ్యారు. పురపాలికలో ఆసుపత్రులు, నర్సింగ్ హోమ్స్​, హోటళ్లకు తాగు నీటి కనెక్షన్లు ఇవ్వాలని సూచించారు. పాలమూరు ప్రజలు సురక్షితమైన మిషన్ భగీరథ నీళ్లు వాడేలా చర్యలు తీసుకోవాలన్నారు.

మరో జాతీయ రహదారి :

జిల్లాకు జడ్చర్ల నుండి దేవసూగూరు వరకు మరో జాతీయ రహదారి వస్తోందని... నూతన సంవత్సరంలో ప్రకటన వెలువడుతుందని తెలిపారు. కొత్త రహదారి జిల్లాకు మరో మణిహారం లాంటిదని అభివర్ణించారు.

ఎయిర్​పోర్టు రానుంది :

రాయచూర్ -మహబూబ్​నగర్ మధ్యలో ఎయిర్ పోర్టు రానుందని మంత్రి తెలిపారు. రోడ్డు నిర్మాణం పూర్తయితే రాయచూరుకు గంట, హైదరాబాద్​కు గంట 45 నిమిషాల్లో చేరుకోవచ్చని చెప్పారు. మహబూబ్​నగర్ మహానగరంగా మారనుందని అశాభావం వ్యక్తం చేశారు. అధికారులు, ఉద్యోగుల సహకారంతో పట్టణం శరవేగంగా అభివృద్ధి చెందిందని వివరించారు. జనవరిలో వెయ్యి కోట్లతో కొత్త పరిశ్రమ జిల్లాకు రానుందని మంత్రి పేర్కొన్నారు. జిల్లా చుట్టుపక్కల నిర్మిస్తున్న దివిటిపల్లి, ఏనుగొండ, ఎస్వీఎస్​, జర్నలిస్ట్ కాలనీ డబుల్ బెడ్ రూమ్ ఇళ్లకు తక్షణమే అన్ని సౌకర్యాలు కల్పించాలన్నారు.

నియామక పత్రాలు అందజేత:

ఐదేళ్ల క్రితం పట్టణానికి వారానికోసారి తాగునీరు వచ్చేదని, ఐదేళ్లలో శరవేగంగా అభివృద్ధి చెందడం ఆశ్చర్యమేస్తోందని శాసనమండలి సభ్యుడు దామోదర్ రెడ్డి అన్నారు. మంత్రి కృషి వల్లే ఇది సాధ్యమైందన్నారు. గ్రూప్ 4 ద్వారా జూనియర్ అసిస్టెంట్లు, టైపిస్టులుగా కొత్తగా ఉద్యోగాలు పొందిన 75 మందికి మంత్రి చేతుల మీదుగా నియామక పత్రాలను అందజేశారు.

ఇదీ చూడండి:ధరణి, రిజిస్ట్రేషన్లపై సీఎం కేసీఆర్ సమీక్ష