Mahbubnagar Farmers Problems : ఉమ్మడి మహబూబ్నగర్ జిల్లాలో రైతులు ధాన్యాన్ని అమ్ముకునేందుకు నానా అవస్థలు పడుతున్నారు. ఓవైపు అకాల వర్షాల భయం వారిని వెంటాడుతోంది. మరోవైపు ఉమ్మడి జిల్లా వ్యాప్తంగా 836 కొనుగోలు కేంద్రాలు ఏర్పాటు చేసి.. సుమారు 12 లక్షల మెట్రిక్ టన్నుల ధాన్యాన్ని కొనుగోలు చేయాలని పౌర సరఫరాల శాఖ లక్ష్యంగా పెట్టుకున్నా ఇప్పటి వరకూ సగం కొనుగోలు కేంద్రాలు తెరచుకోలేదు.
తెరచుకున్న కేంద్రాల్లోనూ కొనుగోళ్లు సాగడం లేదు. తేమశాతం అధికంగా ఉందని, నాణ్యత ప్రమాణాలకు లోబడి లేదని.. కొనుగోలు కేంద్రాల నిర్వాహకులు తూకాలు వేయడం లేదు. రైతుల ఒత్తిడి మేరకు తూకాలు వేసినా.. మిల్లర్లు ధాన్యాన్ని తీసుకునేందుకు నానా కొర్రీలు పెడుతున్నారు. కొనుగోలు కేంద్రం నుంచి మిల్లుకు పంపిన ధాన్యం నాణ్యంగా లేదని.. తాలు ఉందని ధాన్యాన్ని దింపుకునేందుకు నిరాకరిస్తున్నారు.
నాణ్యంగా లేకుండా తామే తరుగుకు అంగీకరిస్తామని.. అన్ని నాణ్యతా ప్రమాణాలకు లోబడి ధాన్యాన్ని తెచ్చినా ఇదేం దోపిడీ అంటూ రైతులు ఆవేదన వ్యక్తం చేస్తున్నారు. ఈ విషయంలో ఎవరికి ఫిర్యాదు చేసినా పట్టించుకోవడం లేదని వాపోతున్నారు.
జోగులాంబ గద్వాల జిల్లాలో 50 వేల మెట్రిక్ టన్నుల ధాన్యం కొనుగోలు కేంద్రాలకు వస్తుందని.. అధికారులు అంచనా వేశారు. కానీ చాలాచోట్ల కొనుగోలు కేంద్రాలు ప్రారంభం కాలేదు. ప్రారంభమైన చోట.. తూకాలు సాగడం లేదు. తూకాలైన ధాన్యాన్ని సైతం మిల్లర్లు తీసుకునేందుకు నిరాకరించడంతో.. ఆ బస్తాలు కొనుగోలు కేంద్రాల్లోనే మూలుగుతున్నాయి.
మిల్లర్లంతా కుమ్మక్కై తాలు అధికంగా ఉందన్న సాకుతో ధాన్యాన్ని తీసుకునేందుకు ముఖం చాటేస్తున్నారు. నాగర్ కర్నూల్ జిల్లా నందివడ్డేమాన్లో ఇద్దరు రైతులు ధాన్యాన్ని కొనుగోలు కేంద్రం వద్ద అమ్మారు. తూకాలు ముగిశాయి. మిల్లర్లు వచ్చి నాణ్యత చూసి ధాన్యం వద్దంటూ నిరాకరించారు. దీంతో ధాన్యం తిరిగి తీసుకువెళ్లాల్సిందిగా కొనుగోలు కేంద్రాల నిర్వాహకులు తిరిగి రైతులకు సమాచారం ఇచ్చారు. తాలు పేరుతో ఇంతటి దోపిడీ గతంలో ఎప్పుడూ చూడలేదని రైతులు ఆవేదన వ్యక్తం చేస్తున్నారు.