పదిహేను రోజులుగా నీరు లేక... దయనీయంగా రైతుల పరిస్థితి

పదిహేను రోజులుగా నీరు లేక... వేసిన పంటలు ఎండిపోయే పరిస్థితి ఏర్పడింది. వారాబందీ పద్ధతిలో వందరోజులు సాగునీరిస్తామన్న అధికారులు... ముందుగానే నిలిపివేశారు. కీలకదశలో ఉన్న మక్క, వరి, పల్లి, మిరపకు... కచ్చితంగా నీరందించాలి. లేదంటే పంట నాశనమవుతుంది. గత్యంతరంలేని స్థితిలో... రైతులు బోరుబావులు అద్దెకు తీసుకుని పంటల్ని బతికించుకునే ప్రయత్నం చేస్తున్నారు. ఇలాంటి పరిస్థితుల్లో ప్రభుత్వమే ఆదుకోవాలని వేడుకుంటున్నారు. ఉమ్మడి పాలమూరు జిల్లాలో కల్వకుర్తి ఎత్తిపోతల ఆయకట్టు రైతుల దీన స్థితిపై కథనం.

మహాత్మాగాంధీ కల్వకుర్తి ఎత్తిపోతల పథకం కింద సాగునీరు అందుతుందని ఆశతో ఆరుతడి పంటలు సహా వరిసాగు చేసిన రైతులు ప్రస్తుతం నీళ్లులేక అల్లాడుతున్నారు. మహాత్మాగాంధీ కల్వకుర్తి ఎత్తిపోతల పథకం కింద నాగర్ కర్నూల్, వనపర్తి, మహబూబ్ నగర్ జిల్లాలోని 22మండలాల్లో సుమారు రెండున్నర లక్షల ఎకరాలకు సాగునీరు అందుతుంది. యాసంగిలో ఆయకట్టు కింద రైతులు వరి, మొక్కజొన్న, వేరుశనగ, మినుము, మిరప సహా వివిధరకాల పంటలు సాగుచేశారు. మొక్కజొన్న శాఖీయ దశ నుంచి పూతదశ, వరి పిలక ఏర్పడే దశ, వేరుశనగ పూత నుంచి ఊడలు దిగే దశలో ఉంది. ఈ దశల్లో నీరందడం చాలాముఖ్యం.

ఈ దశలో ఎండిపోతే...

ఉష్ణోగ్రతలు సైతం పెరగడంతో ఎప్పటికప్పుడు నీరందించాల్సి ఉంది. ఈ దశలో ఎండిపోతే పంటల్ని వదులుకోవాల్సిందే. ఎలాగోలా కాపాడుకున్నా, ఆశించిన దిగుబడి సాధించడం కష్టమే. అలాంటి కీలక దశలో సాగునీరు అందకపోతే తీవ్రంగా నష్టపోతామని రైతులు ఆందోళన వ్యక్తం చేస్తున్నారు. యాసంగిలో వరి వద్దనడంతో చాలామంది రైతులు మొక్కజొన్న, వేరుశనగ, మిరప పంటల వైపు మొగ్గుచూపారు. కొందరు సొంతభూముల్లో, ఇంకొందరు కౌలుకు తీసుకుని పంటల్నిసాగు చేశారు. వేలల్లో పెట్టుబడులు పెట్టారు. మార్చి చివరి వరకూ నీరందితే పంటలు చేతికొచ్చేవి. కానీ ఫిబ్రవరి నుంచి కాల్వలకు నీటివిడుదల నిలిచిపోవడంతో రైతులు లబోదిబోమంటున్నారు.

నీళ్ల కోసం రూ.5 వేల వరకు ఖర్చు

బోరుబావులు, బావులు, ఇతర నీటి వనరులపై ఆధారపడి కొందరు వరివేశారు. మరికొందరు కేఎల్ఐ నీటినే నమ్ముకుని వరిసాగు చేశారు. అలాంటి రైతుల పరిస్థితి ప్రస్తుతం అగమ్యగోచరంగా మారింది. పెట్టిన పెట్టుబడులు సైతం చేతికొచ్చే పరిస్థితి కనిపించడం లేదు. పంటల్ని బతికించేందుకు బోరుబావుల్ని అద్దెకు తీసుకుని మరీ నీరందించే ప్రయత్నం చేస్తున్నారు. ఎకరానికి రూ.5 వేల వరకు నీళ్ల కోసం ఖర్చు చేస్తున్నారు. యాసంగిలో కేఎల్ఐ ఆయకట్టుకు ఆరుతడి పంటలకు 2లక్షల 35వేల ఎకరాలకు వారాబందీ పద్ధతిలో 100రోజుల పాటు సాగునీరు అందిస్తామని డిసెంబర్ 31న పెబ్బేరులో జరిగిన ఉమ్మడి పాలమూరు జిల్లా సాగునీటి సలహామండలి సమావేశంలో అధికారులు నిర్ణయించారు.

ముందుగానే అంచనా వేసి ఉంటే..

అంటే మార్చి చివరివరకూ ఆన్ అండ్ ఆఫ్ పద్ధతిలో సాగునీరు ఇవ్వాల్సి ఉంది. కానీ ఫిబ్రవరి 15 నుంచే కేఎల్ఐ నుంచి సాగునీటి విడుదలను నిలిపివేశారు. కారణం శ్రీశైలం తిరుగు జలాల్లో కావాల్సిన నీటి లభ్యత లేకపోవడమే. శ్రీశైలం తిరుగు జలాల నుంచి నీటిని ఎత్తిపోయడం ద్వారా కేఎల్ఐకి సాగునీరు అందించాల్సి ఉంది. కానీ శ్రీశైలం జలాశయంలో కేవలం 30 టీఎంసీల నీటి నిల్వ మాత్రమే మిగిలి ఉంది. తాగునీటి అవసరాల కోసం కూడా ప్రస్తుతం నీళ్లు లేవు. సాగునీరు ఇచ్చే పరిస్థితి లేదు. ముందుగానే అంచనా వేసి అధికారులు చెప్పి ఉంటే పంటలు వేసుకుని ఉండేవాళ్లం కాదని రైతులు ఆవేదన వ్యక్తం చేస్తున్నారు.

దిక్కుతోచని స్థితిలో రైతులు

ప్రస్తుతం కల్వకుర్తి ఎత్తిపోతల పథకానికి సాగునీరు అందించే పరిస్థితి లేదు. మరోవైపు నీళ్లు లేకుండా అలాగే వారం రోజులు గడిస్తే పంట చేతికొచ్చే అవకాశాలూ తక్కువే.ఈ నేపథ్యంలో నష్టపోతున్న రైతులకు ప్రభుత్వం పరిహారం అందించి ఆదుకోవాలని అన్నదాతలు వేడుకుంటున్నారు. సరిపడా నీళ్లందించాల్సిన సమయంలో పంటలకు నీరందించలేని పరిస్థితి ఉంటే ఆ పంటల్ని వదులుకోవడమే ఉత్తమమని వ్యవసాయశాస్త్రవేత్తలు సూచిస్తున్నారు. అరకొరగా నీరందించి పంటను కాపాడుకున్నా దిగుబడులు సైతం 50 నుంచి 60శాతం మేర పడిపోతాయని అంటున్నారు. ఈ నేపథ్యంలో కేఎల్​ఐ రైతులు ప్రస్తుతం దిక్కుతోచని స్థితిలో పడ్డారు.

ఇదీ చదవండి :సభలో ఒక్కసారిగా విరిసిన నవ్వులు.. పడిపడి నవ్విన కేటీఆర్​.. ఎందుకంటే..?