మార్కెట్​యార్డులో పడుకున్న రైతుపైకి దూసుకొచ్చిన లారీ

పండించిన ధాన్యాన్ని అమ్ముకునేందుకు వచ్చిన రైతు. రాత్రి అక్కడే పడుకున్నాడు. భార్య, మనుమడితో కలిసి నిద్రిస్తున్నాడు. ఇంతలో ఓ లారీ వారిపై నుంచి దూసుకెళ్లింది.

మహబూబ్​నగర్ జిల్లా జడ్చర్లలోని బాదేపల్లి వ్యవసాయ మార్కెట్లో విషాదం చోటుచేసుకుంది. భూత్పూర్ మండలం వెల్కిచర్లకు చెందిన భీమన్న అనే రైతు తన భార్య, మనుమడితో కలిసి వరిధాన్యాన్ని అమ్మేందుకు మార్కెట్​యార్డుకు వచ్చాడు. ఆవరణలో కుప్పగా పోసి రాత్రి ముగ్గురు అక్కడే పడుకున్నారు. మార్కెట్​లో నిల్వ ఉన్న మొక్కజొన్నను తరలించేందుకు వచ్చిన లారీ పడుకొని ఉన్న రైతుపై నుంచి వెళ్లింది.

తాటిపత్రి కప్పుకుని పడుకున్న రైతు కుంటుంబాన్ని లారీ డ్రైవర్​ గమనించకపోవటం వల్ల ప్రమాదం సంభవించింది. ఈ ప్రమాదంలో భీమన్న రెండు కాళ్లు తీవ్రంగా దెబ్బతిన్నాయి. రైతు భార్య, మనుమడు ప్రమాదం నుంచి త్రుటిలో తప్పించుకున్నారు. బాధితున్ని వెంటనే ఆస్పత్రికి తరలించారు. పరిస్థితి విషమంగా ఉండటం వల్ల మెరుగైన వైద్యం కోసం క్షతగాత్రున్ని హైదరాబాద్​కు తరలించారు. పోలీసులు ఘటనా స్థలికి చేరుకుని విచారణ చేపట్టారు. బాధిత రైతుకు మెరుగైన వైద్యం అందిస్తామని మార్కెట్ ఛైర్మన్ మురళి హామీ ఇచ్చారు.

ఇవీ చూడండి: నేను లంచగొండిని కాదని చెప్పుకున్నా.. సమస్యేనా