ప్రస్తుతం పర్యావరణానికి పెనుముప్పుగా పరిణమించిన ప్లాస్టిక్ను వినియోగించకూడదంటూ కేంద్ర, రాష్ట్ర ప్రభుత్వాలు నిబంధనలు కఠినతరం చేస్తున్నాయి. ఈ నేపథ్యంలో గ్రామాల నుంచి పట్టణాల వరకు ప్లాస్టిక్ స్థానంలో కాగితపు, వస్త్రపు సంచులు అందుబాటులోకి తేవాలని భావించింది మహబూబ్నగర్ గ్రామీణాభివృద్ధి సంస్థ. ఈ మేరకు కాగితపు, వస్త్రపు సంచుల ఉత్పత్తుల తయారీపై సుమారు 160 మంది మహిళా సంఘ సభ్యులకు నిపుణులతో ప్రత్యేక శిక్షణ ఇచ్చింది. వారిలో ఉత్సాహవంతులైన మహిళలు కాగితపు, వస్త్రపు సంచుల తయారీకి ముందుకొచ్చారు. కూరగాయలు, దుస్తులు, పుస్తకాలు, లంచ్ బాక్సులు, సరుకులు తీసుకువెళ్లేందుకు వీలుగా సంచులను తయారు చేస్తున్నారు. వారు తయారు చేసిన ఉత్పత్తులను మహబూబ్నగర్ పట్టణం సహా గ్రామాల్లో అమ్ముతున్నారు.
మహిళలు బృందంగా ఏర్పడి
ఒక్కో మహిళా సంఘం నుంచి నలుగురైదుగురు మహిళలు బృందంగా ఏర్పడి కాగితపు, వస్త్రపు సంచులు, ఇతర ఉత్పత్తులను సొంతంగా తయారు చేస్తున్నారు. అవసరమైన ముడిసరుకును సొంత పెట్టుబడితో హైదరాబాద్ నుంచి తెచ్చుకుని అందమైన సంచులను తయారు చేస్తున్నారు. అన్ని రకాలు సైజుల్లో 5 రూపాయల నుంచి 30 రూపాయల వరకూ ఈ సంచులు లభిస్తాయి. కాగితపు పూల బొకెలు, వస్త్రాలతో చేసిన టోపీలు, ఇతర ఉత్పత్తులను అమ్ముతున్నారు. ఒక్కో సంచికి శ్రమను బట్టి రూపాయి నుంచి 5 రూపాయల వరకూ మాత్రమే లాభం చూసుకుని విక్రయిస్తున్నారు. వ్యాపార సముదాయాలు, దుకాణాల నుంచి సైతం ఆర్డర్లు తెచ్చుకుంటున్నారు.