'ఆయిల్ ఫామ్​ సాగుకు రైతులు ముందుకు రావాలి'

ఆరో విడత హరితహారంలో భాగంగా మహబూబ్​నగర్​ జిల్లా అన్నసాగర్​లో దేవరకద్ర ఎమ్మెల్యే ఆల వెంకటేశ్వర్​ రెడ్డి ఉద్యానశాఖ ఆధ్వర్యంలో ఆయిల్​ ఫామ్​ మొక్కలను నాటారు. రాబోయే రోజుల్లో ఈ పంటల సాగుకు మంచి భవిష్యత్తు ఉందన్నారు.

ఆయిల్ ఫామ్ తోటల సాగుకు ప్రభుత్వం చేయూత అందిస్తోందని దేవరకద్ర ఎమ్మెల్యే ఆల వెంకటేశ్వర్ రెడ్డి పేర్కొన్నారు. మహబూబ్ నగర్ జిల్లా భూత్పూర్​ మండలం అన్నసాగర్​లో ఉద్యానశాఖ ఆధ్వర్యంలో ఆయిల్ ఫామ్ మొక్కలను నాటారు. ప్రస్తుతం మార్కెట్లో ఆయిల్ ఫామ్ తోటలకు మంచి డిమాండ్ ఉందన్నారు. రైతులు మార్కెట్ డిమాండ్​ను బట్టి పంటలను సాగు చేయాలని సూచించారు.

సీఎం కేసీఆర్ రైతులకు మంచి చేయాలనే ఉద్దేశంతో ఈ సారి వానాకాలంలో నియంత్రిత పంటలు వేసుకోవాలని సూచించినట్లు వెల్లడించారు. వరి పంటను తగ్గించి వాణిజ్య పంటలపై ఆసక్తి చూపించాలని, ఆయిల్ ఫామ్ మొక్కలు పెంచడానికి రైతులు ముందుకు రావాలని కోరారు. ఈ కార్యక్రమంలో ఉద్యాన శాఖ మహబూబ్ నగర్ జిల్లా అధికారి సాయిబాబా, దేవరకద్ర నియోజకవర్గ క్లస్టర్ అధికారి మహేందర్, ఆయిల్​ ఫెడ్ ఏరియా అధికారి బాలరాజు పాల్గొన్నారు.