BRS Aiming for Hattrick Win in Telangana : 2023 శాసనసభ ఎన్నికల్లో(Telangana Assembly Election 2023) గులాబీ పార్టీ విజయం సాధిస్తే దక్షిణాదిన వరుసగా అధికారం దక్కించుకున్న పార్టీగా బీఆర్ఎస్, సీఎంగా కేసీఆర్ హ్యాట్రిక్(KCR will Hattrick Win) రికార్డుతో చరిత్ర సృష్టిస్తారు. ఉమ్మడి పాలమూరు జిల్లాలోనూ పలువురు రాజకీయ నాయకులు మూడోసారి ముచ్చటైన విజయం కోసం తహతహలాడుతున్నారు. ఉమ్మడి మహబూబ్ నగర్ జిల్లాలో ఇప్పటివరకూ జరిగిన ఎన్నికల్లో 3సార్లు ఎమ్మెల్యేగా ఎన్నికైన వాళ్లు చాలామందే ఉన్నారు. కానీ వరుసగా 3సార్లు విజయం దక్కించుకున్న వాళ్లు మాత్రం కొంతమందే.
Mahabubanagar MLAs Aiming for Hattrick :అలాంటి వరుస విజయాలు అందుకున్న వారిలో కొల్లాపూర్‌ నుంచి జూపల్లి కృష్ణారావు వరుసగా 5సార్లు విజయం సాధించారు. అంతకుముందు కాంగ్రెస్ అభ్యర్ధి కొత్త వెంకటేశ్వరరావు సైతం హ్యాట్రిక్ విజయాన్ని అందుకున్నారు. నాగర్ కర్నూల్ నియోజకవర్గం నుంచి నాగంజనార్ధన్ రెడ్డి వరుసగా 4సార్లు గెలిచారు. గద్వాల నియోజక వర్గం నుంచి డీకే అరుణ మూడుసార్లు వరుసగా ఎమ్మెల్యే అయ్యారు. కల్వకుర్తి నుంచి మాజీ కేంద్ర మంత్రి స్వర్గీయ జైపాల్ రెడ్డి సైతం ఎమ్మెల్యేగా 3 విజయాలు అందుకున్నారు. ఇలాంటి వరుస విజయాల కోసం ప్రస్తుత అభ్యర్థులు వచ్చే ఎన్నికల్లో తీవ్రంగా పోటీపడుతున్నారు.
8 Mahbubnagar MLAs Trying For Hattrick :నియోజక వర్గాల వారీగా చూస్తే మహబూబ్ నగర్ నుంచి మంత్రి శ్రీనివాస్ గౌడ్ 2014, 2018 ఎన్నికల్లో టీఆర్ఎస్ తరఫున పోటీచేసి విజయం సాధించారు. ఈ ఎన్నికల్లోనూ గెలిస్తే హ్యాట్రిక్ ఎమ్మెల్యేగా రికార్డుల్లో నిలవనున్నారు. గతంలో మాజీమంత్రి చంద్రశేఖర్ రెండుసార్లు గెలిచినా, వరుసగా మూడోవిజయాన్ని మాత్రం అందుకోలేకపోయారు. జడ్చర్లలోనూ మాజీమంత్రి లక్ష్మారెడ్డి ఈసారి విజయం సాధిస్తే హ్యాట్రిక్ ఎమ్మెల్యేగా నిలుస్తారు. నర్సప్ప, కృష్ణారెడ్డి వరుసగా రెండుసార్లు విజయం సాధించినా.. మూడోసారి ఆ అదృష్టం దక్కలేదు. దేవరకద్ర నుంచి 2014, 2018 ఎన్నికల్లో గెలిచిన ఆల వెంకటేశ్వర రెడ్డి సైతం మూడోసారి ఎమ్మెల్యే కావాలని శ్రమిస్తున్నారు.