'రానున్న రోజుల్లో తెలంగాణ పర్యాటకానికి మంచి భవిష్యత్ ఉంటుంది‌'

కరోనా వ్యాప్తిని అరికట్టేందుకు కేంద్ర, రాష్ట్ర ప్రభుత్వాలు విధించిన లాక్‌డౌన్‌ పర్యాటక రంగంపై తీవ్రంగా పడింది. దీనికి అనుబంధంగా ఉన్న అతిథ్య రంగంపైన ప్రభావాన్ని చూపింది. పర్యాటక శాఖ పునర్‌ వైభవం సాధించేందుకు ఎంత సమయం పడుతోందన్న అంశాలపై రాష్ట్ర పర్యాటక శాఖ మంత్రి శ్రీనివాస్‌ గౌడ్‌తో ఈటీవీ భారత్‌ ప్రతినిధి జ్యోతికిరణ్‌ ముఖాముఖి...

లాక్‌డౌన్‌ వల్ల రాష్ట్రంలో పర్యాటక రంగం ఏ విధమైన ఇబ్బందులు ఎదుర్కొంటుంది?

లాక్‌డౌన్‌ పర్యాటక రంగమే కాకుండా ప్రపంచంలోని అన్ని రంగాలపైన తీవ్ర ప్రభావాన్ని చూపింది. అనేక దేశాలు పర్యాటక రంగంపైన ఆధారపడి జీవిస్తున్నాయి. సింగపూర్‌, మలేషియా వంటి దేశాలనే ఉదాహరణకు తీసుకోవచ్చు. పర్యాటక రంగంపైనే ఆధారపడిన దేశాల పరిస్థితి అధ్వానంగా ఉంటే మన దేశంలో అనేక రంగాలున్నాయి. కాబట్టి పెద్ద ప్రభావాన్ని చూపిస్తోందని అనుకోవడం లేదు.

కేంద్ర ప్రభుత్వం లాక్‌డౌన్‌ సడలింపుల్లో భాగంగా పర్యాటక రంగానికి అనుమతులు ఇస్తే ఆ దిశగా మీరు సన్నద్ధంగా ఉన్నారా?

పర్యాటక రంగం అంటేనే విదేశీయులు రావాలి. ప్రపంచ దేశాల్లో కరోనా ప్రభావం ఉంది. విమానాశ్రయాలు బంద్ ఉన్నాయి కాబట్టి వచ్చే పరిస్థితి లేదు. తెలంగాణలోని పర్యాటక ప్రాంతాలను కొన్ని జాగ్రత్తలు తీసుకుంటూ అభివృద్ధి పరుస్తాం. లాక్‌డౌన్‌ తర్వాత రాష్ట్రంలో పర్యాటకం అభివృద్ధి చెందుతుంది. చరిత్ర కల్గిన ప్రాంతాలను పర్యాటక ప్రాంతాలుగా తీర్చిదిద్దుతాం.

పర్యాటక రంగాన్ని నమ్ముకుని అనేక మంది జీవిస్తున్నారు. లాక్‌డౌన్‌ వల్ల ఉపాధి కోల్పోయిన వాళ్లకు ఎలాంటి సహాయం అందిస్తున్నారు?

ఉద్యోగులకు జీతాలు ఇవ్వడంతో పాటు పర్యాటక రంగంపైన ఆధారపడిన వాళ్లకు తమ వంతు సాయం చేస్తూనే రాష్ట్ర ప్రభుత్వం 12 కిలోల బియ్యం, రూ.1500 ఇచ్చాం. కాబట్టి వారికి ఎలాంటి ఇబ్బందులు లేవు. మా మహబూబ్‌నగర్‌లో కూడా అనేక పర్యాటక ప్రాంతాలున్నాయి. పాలమూరు- రంగారెడ్డి ప్రాజెక్టును కూడా పర్యాటక ప్రాంతంగా అభివృద్ధి చేస్తాం.

పర్యాటక రంగంపైన ఆధారపడి అనేక రంగాలున్నాయి. ప్రధానంగా అతిథ్య రంగం ఉంది. కేంద్ర ప్రభుత్వం నుంచి ఎలాంటి సహాయ సహాకారాలు కోరుకుంటున్నారు?

కేంద్ర ప్రభుత్వం నుంచి అనేక సహాయ, సహాకారాలు కోరినా... ఇంత వరకు ఏమీ చేయలేదు. చేస్తుందనే ఆశిస్తున్నాం. కేంద్ర ప్రభుత్వం ఇచ్చిన ప్రతి ప్రకటను రాష్ట్ర ప్రభుత్వం పాటించింది. తెలంగాణకు అన్యాయం జరిగిందని ప్రధాని గతంలో అన్నారు. కానీ ఒక్క జాతీయ ప్రాజెక్టు ఇవ్వలేదు. కరోనా సమయంలోనూ ఎలాంటి సాయం చేయలేదు.

రాష్ట్రంలో పర్యాటక రంగానికి పూర్వవైభవం రావడానికి ఎంత సమయం పడుతుంది?

కరోనా కంట్రోల్‌లోకి వచ్చిన ఏడాదిలోపు పర్యాటక రంగానికి పూర్వవైభవం వస్తుంది. అంతవరకు పర్యాటక రంగం అభివృద్ధికి మాస్టర్‌ ప్లాన్‌ రూపొందించాలని నిర్ణయించాం. రామోజీ ఫిల్మ్‌సిటీ వంటి సందర్శనీయ ప్రదేశాలు సైతం పుంజుకుంటాయి.

పర్యాటక రంగానికి ఎలాంటి ప్రోత్సాహాకాలు ఇస్తారు. పన్నులేమైనా తగ్గించే అవకాశం ఉందా?

ముఖ్యమంత్రి సలహా మేరకు ఒక పాలసీని తయారు చేస్తున్నాం. తెలంగాణలో పర్యాటక రంగానికి అద్భుత భవిష్యత్‌ ఉంటుంది.

కేంద్ర ప్రభుత్వం ఎలాంటి ప్రోత్సాహాకాలు ఇవ్వాలని కోరుకుంటున్నారు?

కొన్ని సబ్బిడీలతో పాటు ఆర్థిక సాయం అందించాలి. అన్ని రాష్ట్రాలకు సమానంగా ఆర్థిక సహాకారం చేయాలి. టెంపుట్‌ టూరిజాన్ని అభివృద్ధి పరచాలి. రాష్ట్రాల కన్నా కేంద్ర ప్రభుత్వమే బడ్జెట్‌లో అత్యధిక నిధులు కేటాయించాలి.

ఇదీ చదవండి:కరోనా విరుగుడుకు గుర్రాల యాంటీబాడీస్