దొంగ నోట్లను చలామణి చేస్తున్న కుటుంబం అరెస్టు

యూట్యూబ్​లో చూసి దొంగనోట్లను ఎలా తయారు చేయాలో తెలుసుకున్నాడు. తయారుచేసి చిన్న చిన్న దుకాణాల్లో, బెల్టు షాపుల్లో అతని కుటుంబంతో కలిసి  దొంగనోట్లను చలామణి చేశాడు. చివరకు కుటుంబంతో కలిసి కటకటాలపాలయ్యాడు.

దొంగ నోట్లను చలామణి చేస్తున్న ఒకే కుటుంబానికి చెందిన నలుగురు వ్యక్తులను కేసముద్రం పోలీసులు అరెస్ట్ చేశారు. వారి వద్ద నుంచి 69వేల 900 విలువ గల నకిలీ నోట్లు, 29 వేల 870 నగదు, 2 కలర్ ప్రింటర్లు, జైలో వాహనం,4 సెల్​ఫోన్లను స్వాధీనం చేసుకున్నారు. ఈ ముఠా దాదాపు 3 నెలల నుంచి ఉమ్మడి వరంగల్,ఖమ్మం,నల్గొండ జిల్లాలలోని గ్రామీణ ప్రాంతాల్లో నకిలీ నోట్లను చలామణి చేస్తున్నట్లు మహబూబాబాద్​ ఎస్పీ కోటిరెడ్డి తెలిపారు.
వరంగల్ గ్రామీణ జిల్లా నర్సంపేటకు చెందిన సామల శ్రీనివాస్ గతంలో ఆర్​ఎంపీగా పనిచేశాడు. ఇతనికి భార్య భాగ్య లక్ష్మితో పాటు ఇద్దరు కుమారులు సాయి చరణ్,అఖిల్​లు ఉన్నారు. కుటుంబం గడవక పోవడం వల్ల తొర్రూరులో ఓ హోటల్ ను ప్రారంభించాడు. నష్టం రావడం వల్ల హైదరాబాద్​కు మకాం మార్చి ఆటో నడుపుకుంటూ జీవనం సాగిస్తున్నాడు. ఇతని పెద్ద కుమారుడు సాయి చరణ్ డిగ్రీ చదువుతూ సినీఫీల్డ్​లో చేరి లఘు చిత్రాలు, ప్రైవేట్ సాంగ్ ఆల్బమ్​లు తయారు చేస్తున్నాడు.
ఒకవైపు ఆర్థికంగా దివాలా తీయడం, మరో వైపు డబ్బు అవసరం కావడంతో శ్రీనివాస్​ సులభ మార్గంలో డబ్బులు సంపాదించాలని యూట్యూబ్​లో దొంగ నోట్ల తయారీని చూసి, కలర్ ప్రింటర్​ను కొనుగోలు చేశాడు. దీంతో దొంగ నోట్లను తయారు చేసి సొంత వాహనంలో తిరుగుతూ చిన్న చిన్న కిరాణా దుకాణాలు,బెల్ట్ షాప్​లలో నకిలీ నోట్లను చలామణి చేస్తూ చివరకు కుటుంబ సభ్యులంతా కటకటాలపాలయ్యారు. ఈ ముఠాను పట్టుకునేందుకు కృషి చేసిన సిబ్బందిని ఎస్పీ అభినందించారు.

ఇవీ చూడండి: పేగుబంధం పొమ్మంది... ఆ వృద్ధ దంపతులకు రోడ్డే ఇల్లైంది!