గుండాలో జలపాతంలో పడి యువకుడి దుర్మరణం

కుమురం భీం ఆసిఫాబాద్‌ జిల్లాలో విషాదం చోటుచేసుకుంది. మంచిర్యాల జిల్లాకు చెందిన రంగు రాజు.. గుండాల జలపాతంలో పడి మరణించాడు. జలపాతంలో స్నానం చేస్తుండగా లోయలో పడినట్లు ‌గ్రామస్థులు పేర్కొన్నారు.

కుమురం భీం ఆసిఫాబాద్‌ జిల్లా తిర్యాని మండలంలోని గుండాల జలపాతంలో పడి ఓ యువకుడు మృతి చెందాడు. మంచిర్యాల జిల్లా దండపల్లి మండలం వెల్గనూర్‌కు చెందిన రంగు రాజు ‍‌(20) గురువారం ఉదయం స్నేహితులతో కలిసి గుండాల జలపాతంలో స్నానం చేస్తున్నాడు.

ఆ సమయంలో బండరాయి పైనుంచి ప్రమాదవశాత్తు కాలుజారి రాజు లోయలో పడ్డాడు. దీంతో అతని తలకు తీవ్ర గాయమై మరణించాడని గ్రామస్థులు తెలిపారు. వెంటనే మృతుడి స్నేహితులు సమాచారం అందించడం వల్ల స్థానికులు ఘటనా స్థలానికి చేరుకున్నారు. గజ ఈతగాళ్లతో మృతదేహాన్ని బయటకు తీశారు.

ఇది చదవండి:పాఠశాలల ప్రారంభంపై ఇంకా నిర్ణయం తీసుకోలేదు: విద్యాశాఖ