బురదలో ఇరుక్కుపోయిన వాహనం.. బాలింతకు నరకం

కుమురం భీం జిల్లా కాగజ్​నగర్​ పట్టణంలోని ప్రాథమిక ఆరోగ్య కేంద్రానికి రహదారి సౌకర్యం లేక వాహనం బురదలో ఇరుక్కుపోవడం వల్ల ఓ బాలింత తీవ్ర అవస్థలు పడింది. ఎంత ప్రయత్నించినప్పటికీ... వాహనం బయటకు రాకపోవడం వల్ల కుటుంబసభ్యులు, ఆసుపత్రి సిబ్బంది కలిసి బాలింతను స్ట్రెచర్​పై ఎక్కించి... ఆసుపత్రిలోకి తీసుకువెళ్లి చికిత్స అందించారు.

కుమురం భీం జిల్లా కాగజ్​నగర్ వాంకిడి మండలానికి చెందిన పార్వతబాయికి పురిటి నొప్పులు రావడం వల్ల భర్త సమీర్​.. కుటుంబసభ్యులతో కలిసి కాగజ్​నగర్​ ఆసుపత్రిలో చూపించడానికి వాహనంలో బయలుదేరారు. మార్గమధ్యంలోకి వచ్చేసరికి పార్వతబాయి మగబిడ్డను ప్రసవించింది. తల్లిబిడ్డలను కాగజ్​నగర్​ ప్రభుత్వాసుపత్రిలో చూపెడుదామని తీసుకురాగా.. వాహనం ఆసుపత్రిలోనికి వచ్చేదారిలో బురదలో కూరుకుపోయింది.

ఎంత ప్రయత్నించినప్పటికీ వాహనం బయటకు రాలేదు. బాలింతకు తీవ్ర రక్తస్రావం అవుతుండటంతో... భర్త సమీర్ ఆసుపత్రి సిబ్బందితో కలిసి పార్వతబాయిని స్ట్రైచర్​పై ఆస్పత్రిలోకి తరలించి చికిత్స అందించారు. ప్రస్తుతం తల్లిబిడ్డ క్షేమంగానే ఉన్నప్పటికీ ఆసుపత్రికి రహదారి సౌకర్యం లేకపోవడంతో రోగులు తీవ్ర ఇబ్బందులకు గురవుతున్నారని పలువురు ఆరోపిస్తున్నారు. ఇకనైనా అధికారులు స్పందించి కల్వర్టు నిర్మాణం చేపట్టాలని కోరుతున్నారు.

ఇదీ చదవండి: గాలి ద్వారా కరోనా.. అడ్డుకోవడం ఎలా?