కాగజ్​నగర్​ పురపాలిక బడ్జెట్​కు ఏకగ్రీవ ఆమోదం

కుమురంభీం జిల్లా కాగజ్​నగర్​ మున్సిపాలిటీలో 2020-21 ఏడాదికి గానూ మున్సిపల్​​ ఛైర్మన్​ ప్రవేశపెట్టిన బడ్జెట్​ను పాలకవర్గం ఏకగ్రీవంగా ఆమోదించింది. ​ ఈ సమావేశానికి ఎమ్మెల్యే కోనేరు కోనప్ప హాజరై అభివృద్ధి పనుల పురోగతికై తన వంతుగా ఎమ్మెల్యే నిధులను కేటాయిస్తానని హామీ ఇచ్చారు.

కుమురంభీం జిల్లా కాగజ్​నగర్ పురపాలికలో ప్రవేశపెట్టిన అంచనాల బడ్జెట్​ను పాలకవర్గం సభ్యులు ఏకగ్రీవంగా ఆమోదించారు. పురపాలక సంఘం ఛైర్మన్ సద్దాం హుస్సేన్ అధ్యక్షతన 2020- 21వ సంవత్సరానికి గానూ బడ్జెట్ సమావేశాన్ని నిర్వహించారు. ఈ సమావేశానికి ఎమ్మెల్యే కోనేరు కోనప్ప, జిల్లా అదనపు పాలనాధికారి డా. రాంబాబు హాజరయ్యారు.

ఈ బడ్జెట్లో ఆదాయం రూ. 34.72 కోట్లు కాగా వ్యయం రూ. 34 కోట్ల 66 లక్షలుగా.. మిగులు రూ. 6.37 లక్షలుగా పేర్కొన్నారు. పలువురు కౌన్సిలర్లు అభివృద్ధి పనుల్లో అంచనాల వ్యయం పెంచాలని కోరగా.. ఎమ్మెల్యే నిధులు కేటాయించి.. అభివృద్ధి పనుల పురోగతిపై తనవంతు కృషి చేస్తానని ఎమ్మెల్యే కోనప్ప హామీ ఇచ్చారు.

పట్టణ ప్రగతి కార్యక్రమంలో మంచినీటి పైపుల లీకేజీ, కల్వర్టు నిర్మాణం పనులు రెండు రోజుల్లో చేపడతామని బల్దియా అధికారులు స్పష్టమైన హామీ ఇచ్చినప్పటికీ... అమలు చేయకపోవడంపై ఈనాడులో వచ్చిన కథనాన్ని కౌన్సిలర్ మహమ్మద్ వలి సమావేశంలో ప్రస్తావించారు. స్పందించిన ఎమ్మెల్యే కోనేరు కోనప్ప.. డీఈ గోపాల్, ఏఈ సతీశ్​లను మందలించారు. త్వరితగతిన పనులు చేపట్టాలని వారిని ఆదేశించారు.

ఇవీ చూడండి:రైతు రుణమాఫీకి నిధుల విడుదల