కొనుగోళ్లపై జీఎస్టీ చెల్లించాలని.. అధికారులు నోటీసులు జారీ చేయడం.. ఖమ్మంలో పత్తి వ్యాపారుల సమ్మెకు దారితీసింది. జీఎస్టీఅమల్లోకి రాక ముందు.. పత్తి వ్యాపారులు 5 శాతం వ్యాట్‌, 2శాతం సీఎస్‌టీ చెల్లించారు. 2017 జులై 1న జీఎస్టీ అమల్లోకి వచ్చింది. అప్పటి నుంచి 2017 అక్టోబరు వరకు అన్ని రకాల పంట ఉత్పత్తులపై ఒకే రకమైన అమ్మకం పన్ను ఉంది. 2017 నవంబర్ 15న కేవలం పత్తి ఖరీదుపైన 5 శాతం జీఎస్టీ విధించారు.
పత్తిని ప్రత్యేకంగా రివర్స్‌ ఛార్జీ మెకానిజమ్‌లోకి తెచ్చారు. పక్షం వ్యవధిలో మారిన జీవో గురించి వ్యాపారులకు సరైన సమాచారం లేదు. ఆ జీవోలో కొనుగోళ్లపై జీఎస్టీ చెల్లించాలనే నిబంధన ఉంది. కానీ వ్యాపారులు పాత విధానంలోనే అమ్మకంపై పన్ను చెల్లించారు. దీని వల్ల ప్రభుత్వ ఆదాయానికి ఎలాంటి నష్టం జరగలేదని వ్యాపారవర్గాలు చెబుతున్నాయి. కానీ సరైన విధానంలో చెల్లించక పోవడం వల్ల తిరిగి చెల్లించాలని అధికారులు ఇటీవల నోటీసులు జారీ చేయడంపై ఆగ్రహం వ్యక్తం చేస్తున్నారు.
ఇలా ఒక్క ఖమ్మం వ్యవసాయ మార్కెట్‌ పరిధిలోనే.. 30 మంది పత్తి వ్యాపారులు రూ.30 కోట్ల చెల్లింపులు చేయాలని నోటీసులు జారీ చేశారు. జిల్లాలోని మిగతా అన్ని ప్రాంతాల్లో సుమారు 100 మంది పత్తి ఖరీదుదారులు రూ.60 కోట్లకు పైగా చెల్లించాల్సి ఉంటుందన్నారు. ఈ విషయం తేలేవరకు పత్తి కొనుగోళ్లు చేయబోమంటూ.. వ్యాపారులు తేల్చిచెబుతున్నారు. పత్తి కొనుగోళ్లు నిలిచిపోవడంతో.. మార్కెట్‌కు సెలవులు ప్రకటించిన మార్కెట్‌ అధికారులు వ్యాపార వర్గాలతో చర్చలు జరుపుతున్నారు.