రైతుల సంక్షేమమే లక్ష్యంగా రాష్ట్ర ప్రభుత్వం పనిచేస్తోందని వైరా ఎమ్మెల్యే రాములు నాయక్ పేర్కొన్నారు. ఖమ్మం జిల్లా వైరా జలాశయం నుంచి ఆయకట్టుకు నీటిని విడుదల చేశారు. అనంతరం మండలంలోని తాటిపూడి, రెబ్బవరం గ్రామాల్లో ప్రభుత్వం చేపడుతోన్న పలు అభివృద్ధి కార్యక్రమాలకు శంకుస్థాపన చేశారు.
వ్యవసాయ రంగానికి భరోసా కల్పిస్తూ.. సీఎం కేసీఆర్ అన్నదాతలకు ప్రత్యేక పథకాలను ప్రవేశపెట్టారని ఎమ్మెల్యే కొనియాడారు. సాగునీటి వనరులను మెరుగు పరిచేందుకు ప్రభుత్వం ప్రాజెక్టుల నిర్మాణాన్ని ప్రతిష్టాత్మకంగా తీసుకుందన్నారు. కాళేశ్వరం ద్వారా రాష్ట్రంలో వేలాది ఎకరాలు సాగులోకి వచ్చాయని గుర్తు చేశారు.