Puvvada on polavaram: పోలవరంపై మరోసారి అధ్యయనం చేయాలి: పువ్వాడ

Puvvada on polavaram: ఈ ఏడాది గోదావరి వరద వల్లనే ఖమ్మం జిల్లాలో లక్షల ఎకరాల ముంపునకు గురైనట్లు రాష్ట్ర రవాణా శాఖ మంత్రి పువ్వాడ అజయ్ కుమార్ అన్నారు. ఖమ్మం జిల్లాకేంద్రంలోని తెలంగాణ భవన్​లో ఆయన మాట్లాడారు. పోలవరం కాఫర్ డ్యాం నిర్మాణంతో భద్రాద్రి రామయ్య కూడా మునిగిపోతాడని పువ్వాడ అజయ్ తెలిపారు.

Puvvada on polavaram: పోలవరం ప్రాజెక్టుతో ఖమ్మం జిల్లాలోని ఏడు మండలాలు ముంపునకు గురవుతాయని రాష్ట్ర రవాణా శాఖ మంత్రి పువ్వాడ అజయ్ కుమార్ తెలిపారు. రాష్ట్రంలో కురిసిన భారీ వర్షాలకు వరద తగ్గకపోవడంతో ముంపు ప్రాంతాలు మరింత పెరిగే అవకాశముందని తేలిందన్నారు. ముందుగా ప్రతిపాదించినట్లు పోలవరం ప్రాజెక్టులో 36 లక్షల క్యూసెక్కులు నీటి నిలువ సామర్థ్యం ఉంటుందని భావించినట్లు వెల్లడించారు. కానీ ఇప్పుడు కాఫర్ డ్యాం కూడా కాంక్రీట్​తో నిర్మించేలా ఏపీ ప్రభుత్వం ఆలోచన చేస్తోందని పేర్కొన్నారు.

పోలవరం వల్ల మరింత ముప్పు ఏర్పడే ప్రమాదముంది. భద్రాద్రి రామయ్య ఆలయం కూడా మునిగిపోయే అవకాశముంది. కేంద్రం, ఏపీ ప్రభుత్వాలు మాకు సహకరించాలి. పోలవరంపై కేంద్రం మరోసారి అధ్యయనం చేయాలి. సాధ్యమైనంత త్వరగా ఐదు గ్రామాలు తెలంగాణలో కలపాలి. రెండు రాష్ట్రాలకు ఇష్ట దేవుడైన భద్రాచలాన్ని కాపాడుకోవాల్సిన బాధ్యత మనందరిపై ఉంది.- పువ్వాడ అజయ్ కుమార్, రాష్ట్ర రవాణాశాఖ మంత్రి

పోలవరం కాఫర్ డ్యాం నిర్మాణంతో మరో పదహారు లక్షల క్యూసెక్కులు నీరు నిల్వ ఉంటే భద్రాద్రి రామయ్య కూడా మునిగిపోతాడని పువ్వాడ అజయ్ తెలిపారు. కేంద్రం పోలవరం ప్రాజెక్టుపై అధ్యయనం చేయాలని ఖమ్మం జిల్లా ప్రతినిధులుగా డిమాండ్ చేస్తున్నట్లు వెల్లడించారు. సాధ్యమైనంత తొందరగా పార్లమెంట్​లో ఆర్డినెన్స్ తీసుకొచ్చి భద్రాద్రి చుట్టుపక్కల ఉన్న ఐదు గ్రామాలను తెలంగాణలో కలపాలని డిమాండ్ చేశారు. కరకట్ట నిర్మాణం ద్వారా తెలుగువారి ఇష్ట దైవమైన రామయ్యను కాపాడుకోవచ్చని తెలిపారు. దీనికి కేంద్రం, ఏపీ ప్రభుత్వం సహకరించాలని మంత్రి పువ్వాడ అజయ్ విజ్ఞప్తి చేశారు.

ఇవీ చదవండి:కాళేశ్వరం ప్రాజెక్టుకు జాతీయ హోదా అర్హత లేదు.. కేంద్రం స్పష్టం