'న్యాయవాదుల హత్యపై సీబీఐ విచారణ జరిపించాలి'

రాష్ట్రంలో సంచలనం సృష్టించిన వామన్‌రావు దంపతుల హత్యకు నిరసనగా రాష్ట్రవ్యాప్తంగా న్యాయవాదులు ఆందోళనకు దిగారు. హత్యకేసు నిందితులను కఠినంగా శిక్షించాలంటూ ఖమ్మం జిల్లా న్యాయవాదులు డిమాండ్​ చేశారు. ఈ ఘటనపై సీబీఐ దర్యాప్తు చేయాలంటూ ప్రధాన రహదారిపై బైఠాయించి నిరసన వ్యక్తం చేశారు.

వామన్​రావు న్యాయవాద దంపతుల హత్యకేసు నిందితులకు తక్షణమే శిక్షపడేలా చర్యలు తీసుకోవాలని ఖమ్మం జిల్లా న్యాయవాదులు డిమాండ్ చేశారు. ఖమ్మం బార్‌ అసోసియేషన్​ ఆధ్వర్యంలో ప్రధాన రహదారిపై జిల్లా కోర్టు న్యాయవాదులు బైఠాయించి రాస్తారోకో నిర్వహించారు. రాష్ట్రంలో న్యాయవాదులకే రక్షణ లేకపోతే సామాన్య ప్రజల పరిస్థితి ఏంటని ప్రభుత్వాన్ని నిలదీశారు.

వామన్​ రావు దంపతులు సామాన్యుల తరఫున, ప్రజాప్రతినిధుల ఆక్రమాలపై న్యాయం కోసం పోరాడేవారన్నారు. ఈ హత్యలపై హైకోర్టు ప్రత్యేక అధికారితో విచారణ జరపాలని, సీబీఐ దర్యాప్తు చేయాలని డిమాండ్ చేశారు. వారి కుటుంబానికి రూ.5 కోట్ల పరిహారం చెల్లించాలన్నారు. పేదల పక్షాన పోరాడే న్యాయవాదులకు ప్రభుత్వం రక్షణ కల్పించాలని కోరారు.

ఇదీ చూడండి :న్యాయవాదుల ఆందోళన.. విధుల బహిష్కరణ