ఖమ్మం కథ వేరే ఉందిగా - విజయం మాదంటే మాదంటున్న అభ్యర్థులు

Khammam District Election Results 2023 : ఉమ్మడి ఖమ్మం జిల్లాలో అభ్యర్థులు ఎవరికివారే గెలుపుపై ధీమాతో కనిపిస్తున్నారు. లోలోన మాత్రం మథన పడుతున్నారు. గెలుపు లెక్కలు, పోలింగ్ సాగిన తీరుపై దాదాపు అన్ని రాజకీయ పార్టీలు ప్రత్యేక దృష్టి సారిస్తున్నాయి. ఉమ్మడి ఖమ్మం జిల్లాలో 8 చోట్ల ద్విముఖ పోరు, 2 చోట్ల త్రిముఖ పోరు ఉండటంతో గెలుపు ఎవరి తలుపు తడుతుందోనన్నది జిల్లాలో ఆసక్తికరంగా చర్చ సాగుతోంది.

Khammam District Election Results 2023 : ఖమ్మం, భద్రాద్రి కొత్తగూడెం జిల్లాలోని 10 అసెంబ్లీ నియోజకవర్గాల్లో ఓటరు తీర్పు ఎలా ఉండబోతుందన్నది రాజకీయ వర్గాల్లోనే కాకుండా జిల్లావ్యాప్తంగా ఆసక్తికరమైన చర్చకు దారి తీస్తోంది. ప్రధాన పార్టీలు, అభ్యర్థులు అత్యంత ప్రతిష్టాత్మంగా తీసుకున్న ఈ ఎన్నికల తీర్పు ఆదివారం వెల్లడికానుంది. ఓటరు మహాశయులు ఎవరివైపు మొగ్గు చూపారన్నది ఉత్కంఠ రేపుతోంది. నియోజకవర్గాల్లో గత ఎన్నికలతో పోలిస్తే.. ఈసారి పోలింగ్ శాతం తగ్గడం అభ్యర్థుల్ని కలవరపెడుతోంది. ఉమ్మడి ఖమ్మం జిల్లాలో 8 చోట్ల ద్విముఖ పోరు, మరో రెండు స్థానాల్లో త్రిముఖ పోరు కనిపిస్తోంది.

Polling Percentage In Khammam : ప్రధాన పార్టీలు, అభ్యర్థులు గెలుపు లెక్కలు వేసుకుంటున్నారు. నియోజకవర్గాల వారీగా పోలైన ఓట్లు, పోలింగ్ శాతంపై సమీక్షస్తున్నారు. పోలింగ్ బూత్‌ల వారీగా నాయకులు, ఇంఛార్జీలతో ఎడతెగని చర్చలు జరుపుతున్నారు. ఓటర్లను పోలింగ్ కేంద్రాలకు తీసుకొచ్చేందుకు అన్ని రకాల ప్రయత్నాలు చేసినప్పటికీ.. గత ఎన్నికల కన్నా ఈసారి తక్కువే పోలింగ్ నమోదు కావడంతో ప్రధాన పార్టీల అభ్యర్థుల్ని కలవరానికి గురిచేస్తోంది. తగ్గిన పోలింగ్ శాతం ప్రభావం తమపై ఏమైనా పడుతుందన్న భయం వెంటాడుతోంది.

Paleru Election Results 2023 : బీఆర్​ఎస్​, కాంగ్రెస్ ముఖ్యనేతలతోపాటు సీపీఎం, సీపీఐ రాష్ట్ర కార్యదర్శులు తమ్మినేని వీరభద్రం, కూనంనేని సాంబశివరావు.. ఉమ్మడి ఖమ్మం జిల్లా నుంచి అదృష్టాన్ని పరీక్షించుకుంటున్నారు. ఖమ్మం నియోజకవర్గం రాష్ట్రంలోనే అత్యంత హాట్ సీటుగా మారింది. ఇక్కడ బీఆర్​ఎస్​-కాంగ్రెస్ ఢీ అంటే ఢీ అన్నాయి. పువ్వాడ అజయ్-తుమ్మల నాగేశ్వరరావులో ఎవరుపై చేయి సాధిస్తారన్న అంశం సర్వత్రా ఉత్కంఠ రేపుతోంది. త్రిముఖ పోరు నెలకొన్న పాలేరు తీర్పు ఆసక్తికరంగా మారింది.

బీఆర్​ఎస్​ నుంచి కందాల ఉపేందర్ రెడ్డి, కాంగ్రెస్ నుంచి పొంగులేటి శ్రీనివాస్ రెడ్డి, సీపీఎం నుంచి తమ్మినేని వీరభద్రం బరిలో ఉండగా.. విజయం ఎవరి వైపు నిలుస్తుందన్న అంశాలపై ఎవరికి వారే ధీమాతో ఉన్నారు. ప్రధాన పోటీ బీఆర్​ఎస్​-కాంగ్రెస్ మధ్య ఉన్నట్లు పోలింగ్ తీరు స్పష్టం చేస్తుంది. అయితే.. సీపీఎం చీల్చిన ఓట్లు ఎవరికి లాభం, ఎవరికి నష్టం అన్నదే ఇక్కడ ప్రధాన అంశం. వైరాలో ద్విముఖ పోరులో బీఆర్​ఎస్​ అభ్యర్థి మదన్​లాల్, కాంగ్రెస్ అభ్యర్థి రాందాస్ నాయక్ ఎవరికి వారు గెలుపుపై ధీమాతో ఉన్నారు. కాంగ్రెస్ కార్యకర్తలు అత్యంత ప్రతిష్టాత్మకంగా తీసుకోవడంతో ఇక్కడ గెలుపు వరిస్తుందని కాంగ్రెస్ భావిస్తుంది.

Who Wins Madhira Seat : మధిరలో ద్విముఖ పోరులో కాంగ్రెస్ అభ్యర్థి భట్టి విక్రమార్క-బీఆర్​ఎస్​ అభ్యర్థి కమల్‌రాజ్‌లో ఎవరు సత్తా చాటుతారన్నది ఆసక్తి రేపుతుంది. సత్తుపల్లి గడ్డపై మరోసారి సండ్ర వెంకటవీరయ్య విజయబావుటా ఎగురవేస్తారా.. లేదా తొలిసారి గెలిచి మట్టా రాగమయి సత్తా చాటుతారా అన్నది అందరి దృష్టిని ఆకర్శిస్తోంది. కొత్తగూడెంలో త్రిముఖ పోరులో ఎవరు గెలుపు తీరాలకు చేరుతారన్నది ఇప్పుడు చర్చనీయాంశంగా ఉంది. బీఆర్ఎస్​ నుంచి వనమా వెంకటేశ్వరరావు, సీపీఐ నుంచి కూనంనేని సాంబశివరావు, ఫార్వార్డ్ బ్లాక్ నుంచి జలగం వెంకట్రావు పోటీలో ఉండగా.. గెలుపుపై ఎవరికి వారే ధీమాతో ఉన్నారు.

ఇల్లందు, పినపాకలో ఈసారి పోటీపడుతున్న పాత ప్రత్యర్థుల్లో ప్రజలు ఎవరికి పట్టం కట్టారన్నది ఆసక్తి రేపుతోంది. భద్రాచలంలో మరోసారి గెలుపు ఖాయమని కాంగ్రెస్ అభ్యర్థి పొదెం వీరయ్య, తొలిసారి ప్రజలు ఆదరించబోతున్నారని బీఆర్​ఎస్​ అభ్యర్థి తెల్లం వెంకట్రావు ధీమాతో ఉన్నారు. అశ్వారావుపేటలో బీఆర్​ఎస్​-కాంగ్రెస్ మధ్య నువ్వా నేనా అన్నట్లు సాగిన పోరులో ఎవరు విజయం సాధిస్తారన్న చర్చ సాగుతుండగా.. గెలుపుపై ఇరు పార్టీలు ఎవరికి వారే గెలుపు లెక్కలు వేసుకుంటున్నారు.