కరోనా ప్రభావం లేకుండా గర్భిణులకు వైద్య సేవలందిస్తామని ప్రభుత్వం చెబుతున్నా క్షేత్రస్థాయిలో పరిస్థితులు మాత్రం అందుకు భిన్నంగా ఉన్నాయి. కొవిడ్‌తో ఆసుపత్రుల్లో వైద్యం అందక.. ఇంట్లోనే కాన్పు జరుగుతున్న ఘటనలు పరిస్థితి తీవ్రతకు అద్దం పడుతున్నాయి.
ఖమ్మం రమణగుట్ట ప్రాంతంలో ఓ చిన్న ఇంట్లో లలిత, రమేష్ దంపతులు నివాసం ఉంటున్నారు. రమేష్.. ఖమ్మం రైల్వే స్టేషన్‌లో ఒప్పంద పారిశుద్ధ్య కార్మికుడు. లలిత కూడా అక్కడే పనిచేసేది. నెలలు నిండటంతో గత రెండు నెలలుగా ఇంట్లోనే ఉంటుంది. ఈనెల 13న లలితకు పురిటి నొప్పులు వచ్చాయి. ఉమ్మ నీరు సైతం ఎక్కువ పోయింది. సాయంత్రం 6 గంటల ప్రాంతంలో 108 ద్వారా ఖమ్మం జిల్లా ప్రధాన ఆస్పత్రికి వెళ్లారు. కనీసం అంబులెన్స్‌ కూడా దిగక ముందే ఇక్కడ వైద్యులు లేరు...అని సమాధానం వచ్చింది. నర్సులు మాత్రమే ఉన్నామని.... వేరే ఆస్పత్రికి వెళ్లమని చెప్పారు.
చేసేదేమి లేక ఖమ్మంలోని ఓ ప్రైవేటు వైద్య కళాశాలకు వెళ్లారు. అక్కడ ఆమె ఆయసపడటం.. కరోనా భయం.. వరంగల్‌ వెళ్లమని చెప్పారు. ఓ ప్రైవేటు అంబులెన్స్‌ మాట్లాడుకొని.. ఖమ్మంలోనే నాలుగు ఆస్పత్రులకు వెళ్లారు. ఒక్కరు కూడా చేర్చుకోలేదు. మరో ఆసుపత్రికి తాళం వేసి ఉంది. మరో రెండు ఆస్పత్రుల్లో వైద్యులు.. చూసేందుకు సైతం భయపడ్డారు. ఈ పరిస్థితుల్లో చేసేదేమి లేక అర్ధరాత్రి ఇంటికి తిరిగి వచ్చారు. నొప్పులు ఎక్కువ కావటంతో తెల్లవారుజామున ఇరుగు పోరుగు వారు వచ్చారు. అందులో ఒకరు ప్రైవేటు ఆస్పత్రిలో నర్సుగా పనిచేస్తున్నారు. ఆమె కాన్పు చేసింది. ప్రస్తుతం తల్లి బిడ్డ క్షేమంగా ఉన్నారు.