పాఠం వినట్లేదని కుర్చీతో కొట్టాడట...!

తరగతి గదిలో విద్యార్థులు అల్లరి చేస్తే... మందలిస్తారు. వినకపోతే బెత్తంతో రెండు దెబ్బలేస్తారు. కానీ ఓ మాస్టారు మాత్రం ఏకంగా కుర్చీనే వాడాడు. ఫలితంగా విద్యార్థికి కన్నుకు గాయమై ఆస్పత్రి పాలయ్యాడు. కొంచెం అటోఇటో అయితే కంటికే తగిలేది.

పాఠం సరిగా వినట్లేదని విద్యార్థిని కుర్చీతో కొట్టి కోపం తీర్చుకున్నాడు ఓ ప్రభుత్వ పాఠశాల ఉపాధ్యాయుడు. కరీంనగర్​ జిల్లా హుజూరాబాద్​ ప్రభుత్వోన్నత పాఠశాలలో కడారి దినేశ్​ 9వ తరగతి చదువుతున్నాడు. పాఠాలు చెబుతున్న సమయంలో సదరు విద్యార్థి సరిగ్గా వినటం లేదని ఉపాధ్యాయుడు గమనించాడు. తీవ్ర కోపంతో ఊగిపోయిన ఆయన చేతిలో బెత్తం లేకపోవడంతో పక్కనే ఉన్న కుర్చీతో విద్యార్థిని కొట్టాడు.

ఈ ఘటనలో దినేశ్​ కంటి వద్ద గాయమైంది. రక్తస్రావం జరగటాన్ని గమనించిన ఉపాధ్యాయులు, విద్యార్థులు హుటాహుటిన ఆస్పత్రికి తరలించారు. చికిత్స అందించిన వైద్యులు... మెరుగైన చికిత్స కోసం ఎంజీఎంకు తరలించారు. విద్యార్థికి మెరుగైన వైద్యం అందించి... ఉపాధ్యాయునిపై చర్యలు తీసుకుంటామని ప్రధానోపాధ్యాయుడు వెల్లడించారు.