మీకు నేనున్నా: అనాథ పిల్లలతో ఎమ్మెల్యే సుంకె సహపంక్తి భోజనం

కష్టాల్లో ఉన్న వారికి అండగా నిలవడమే కాదు.. ఇచ్చిన మాటను నిలబెట్టుకోవడంలోనూ ఎమ్మెల్యే సుంకె రవిశంకర్​ది ప్రత్యేక స్థానం. గతంలో తాను అండగా నిలిచిన బాధితులకు ఇచ్చిన మాట ప్రకారం వారితో కలిసి సహపంక్తి భోజనం చేశారు. స్వయంగా వడ్డించి.. వారి కష్టసుఖాలను తెలుసుకున్నారు. మీకు నేనున్నానంటూ భరోసా కల్పించారు.

కరీంనగర్​ జిల్లా చొప్పదండి మండలం కాట్నపల్లిలో తల్లిదండ్రులను కోల్పోయి అనాథలుగా మారిన సమత, మమత, గంగాధర మండలం ర్యాలపల్లికి చెందిన అక్కా తమ్ముళ్లు మనీషా, రాజులతో ఎమ్మెల్యే సుంకె రవిశంకర్​ తన క్యాంపు కార్యాలయంలో సహపంక్తి భోజనం చేశారు.

గతంలో వీరికి ఆర్థిక సాయం అందజేయగా.. వారికి జీవితంపై భరోసానిచ్చేలా ఏటా వారితో భోజనం చేసి కష్టసుఖాలు పంచుకుంటామని హామీ ఇచ్చిన నేపథ్యంలో ఈ కార్యక్రమం చేపట్టినట్లు ఎమ్మెల్యే తెలిపారు. ఈ సందర్భంగా వారికి నూతన దుస్తులు పంపిణీ చేశారు. కార్యక్రమంలో ఎంపీపీ రవీందర్​, మార్కెట్​ ఛైర్మన్​ చంద్రశేఖర్​గౌడ్​, భూమారెడ్డి, సాంబయ్య, అజయ్​కుమార్​ తదితరులు పాల్గొన్నారు.

చిన్నారులకు నూతన దుస్తులు అందజేసిన ఎమ్మెల్యే