గర్భిణి కోసం అంబులెన్స్​ వస్తే.. కంచె అడ్డొచ్చి ఆపేసింది.!

కరోనాను తరిమికొట్టేందుకు గ్రామ సరిహద్దుల్లో ఎక్కడికక్కడ ముళ్ల కంచె ఏర్పాటు చేశారు. అంతా బాగానే ఉన్నా ఏదైనా ప్రమాదం జరిగినప్పుడు ఆస్పత్రికి ఎలా వెళ్తారానేది ప్రశ్నగా మారింది. కరీంనగర్​ జిల్లా గంగిపల్లిలో ఓ గర్భిణి నొప్పులతో బాధపడుతున్నట్లు 108 సిబ్బందికి సమాచారం అందింది. వారు వెంటనే బయల్దేరారు. కానీ వెళ్లే దారిలో ముళ్ల కంచె ఉండడం వల్ల అంబులెన్సు వెళ్లడం కష్టంగా మారింది.

కేంద్ర, రాష్ట్ర ప్రభుత్వాల పిలుపుతో పల్లెలు అప్రమత్తమయ్యాయి. కరోనా రాకుండా అన్ని జాగ్రత్తులు తీసుకుంటున్నారు. బయట వారిని గ్రామంలోకి రాకుండా చూసుకుంటున్నారు. రోడ్లపై ముళ్ల కంచెలు ఏర్పాటు చేసుకున్నారు. వీటితో ఇబ్బందులు తలెత్తటమే కాకుండా సకాలంలో వైద్య సిబ్బంది గ్రామాలకు చేరుకోలేకపోతున్నారు.

కరీంనగర్‌ జిల్లా వీణవంక మండలం గంగారం వద్ద ముళ్ల కంచె ఏర్పాటు చేశారు. మానకొండూరు మండలం గంగిపల్లిలో ఓ గర్భిణి నొప్పులతో బాధపడుతున్నట్లు 108 సిబ్బందికి సమాచారం అందింది. వీణవంక మండలం చల్లూరులో ఉన్న ఆంబులెన్స్‌ గంగిపల్లికి వెళ్తుండగా... గంగారం వద్ద రోడ్డుపై ఏర్పాటు చేసిన ముళ్లకంచె అడ్డుగా వచ్చింది.

108 సిబ్బంది పలు ఇబ్బందులకు గురయ్యారు. ముళ్లకంచెను పక్కకు తొలగించి గంగిపల్లికి పయనమయ్యారు. ఇలా పలుగ్రామాల్లో కంచెలను ఏర్పాటు చేయడం వల్ల సేవలను అందించడంలో కొంత జాప్యంతో పాటు తమకు ఇబ్బంది కలుగుతుందని 108 సిబ్బంది వాపోతున్నారు.

ఇదీ చదవండి:పవన్‌ దాతృత్వం: కరోనాపై పోరుకు భారీ విరాళం