ఒకే వారంలో భార్యా, భర్త మృతి.. అనాథలైన పిల్లలు

కరోనా మహమ్మారి ఓ కుటుంబంలో తీవ్ర విషాదాన్ని మిగిల్చింది. వారం రోజుల్లోనే భార్యాభర్తలు ఇద్దరిని కరోనా రక్కసి చిదిమేసి.. వారి పిల్లలను అనాథలుగా మారిన ఘటన కామారెడ్డి జిల్లా కేంద్రంలో చోటుచేసుకుంది.

కామారెడ్డి జిల్లా కేంద్రంలోని పంచముఖి కాలనీకి చెందిన రాజేశ్​ అనే వ్యక్తి ఈ నెల 7న కరోనా లక్షణాలతో మృతి చెందాడు. ఇతనికి భార్య, ఇద్దరు ఆడ పిల్లలు. రాజేష్​కు కరోనా లక్షణాల విషయం తెలియక అంత్యక్రియల్లో 70 నుంచి 80 మంది బంధువు పాల్గొన్నారు. రాజేష్​కు కరోనా లక్షణాలుండగా.. అతని భార్యకు పరీక్షలు చేయగా కరోనా పాజిటివ్ వచ్చింది. గురువారం ఆమె కూడా మరణించింది.

భర్త చనిపోయిన వారం రోజుల్లోనే భార్య కూడా మరణించగా.. ఆ ఇంట్లో తీవ్ర విషాదఛాయలు అలుముకున్నాయి. పిల్లల్లో ఒకరికి కరోనా పాజిటివ్ నిర్ధరణవగా.. రాజేష్​ అంత్యక్రియలకు హాజరైన వారిలో ఆరుగురికి వ్యాధి సోకింది. మలి దశలో తమకు తోడుగా ఉంటారనుకున్న కొడుకు, కోడలు మరణించడంతో రాజేష్ తల్లిదండ్రులు, ఒంటరైన ఇద్దరూ ఆడపిల్లలను చూసి బోరున విలపిస్తున్నారు.

ఇదీ చదవండి:'ఐదు నెలల్లో కేరళ విమాన ప్రమాదంపై నివేదిక'