మూడు కుటుంబాలను ఛిన్నాభిన్నం చేసిన అతివేగం

అతివేగం మూడు కుటుంబాల్లో విషాదం నింపింది. విదేశాలకు వెళ్తున్న బంధువుకు వీడ్కోలు పలికేందుకు వెళ్లి... తిరిగి రాని లోకాలకు వెళ్లిపోయారు. కామారెడ్డి జిల్లా బిక్కనూర్​ వద్ద జరిగిన రోడ్డు ప్రమాదంలో తల్లీకూతురుతో పాటు మరో ఇద్దరు యువకులు దుర్మరణం చెందారు. ఈ ప్రయాణం మూడు కుటుంబాలను ఛిన్నాభిన్నం చేసింది.

కామారెడ్డి జిల్లా బిక్కనూర్​ మండలం జంగంపల్లి గ్రామశివారు కృష్ణ మందిరం వద్ద తెల్లవారు జామున నాలుగున్నర గంటలకు రోడ్డు ప్రమాదం జరిగింది. డివైడర్​ను ఢీకొన్న కారు... పక్కనే ఉన్న మర్రి చెట్టును ఢీకొట్టింది. ఈ ప్రమాదంలో నలుగురు మృత్యువాత పడ్డారు.

నిజామాబాద్​ నగరంలోని పద్మానగర్​కు చెందిన మంథని లావణ్య(34), ఆమె కూతురు మంథని రోష్ని(15)తో పాటు నవీపేట్​కు చెందిన ప్రశాంత్​(23), ఆర్మూర్​కు చెందిన సుశీల్​ కుమార్​ (21)లు అక్కడిక్కడే దుర్మరణం చెందారు.

నుజ్జునుజ్జయిన కారు

చెట్టును ఢీకొన్న కారు నుజ్జునుజ్జైంది. పక్కనే ఉన్న హోటల్​ యజమాని గమనించి పోలీసులకు సమాచారం అందించారు. ఘటనా స్థలానికి పోలీసులు చేరుకుని చూసేసరికి కారులో ఉన్న అందరూ చనిపోయి ఉన్నారు. మృతదేహాలను బయటకు తీసేందుకు పోలీసులు తీవ్రంగా శ్రమించారు. గ్యాస్​ కట్టర్​లతో కారు భాగాలను తొలగించి మృతదేహాలను బయటకు తీశారు.

భర్త గల్ఫ్​​లో...

ప్రమాదంలో మరణించిన లావణ్య భర్త గల్ఫ్​​లో ఉంటారు. వీరికి ఇద్దరు పిల్లలు. కుమారుడు హైదరాబాద్​లో ఇంటర్​ చదువుతుండగా... కూతురు స్థానికంగానే తల్లితో కలిసి ఉంటోంది. లావణ్య ఇంట్లో అరుణ్​కుమార్​ అనే వ్యక్తి అద్దెకు ఉంటున్నాడు.

సెండ్​ఆఫ్​ చెప్పడానికి వెళ్లి...

అరుణ్​కుమార్​ ఉద్యోగం కోసం ఇరాక్​ దేశం వెళ్తున్నాడు. అతనికి వీడ్కోలు పలికేందుకు తన కూతురు రోష్ని, అరుణ్​ బంధువులు ప్రశాంత్​, సుశీల్​ రాత్రి హైదరాబాద్​ శంషాబాద్​ విమానాశ్రయానికి వెళ్లారు. అరుణ్​కు ఎయిర్​పోర్ట్​లో వీడ్కోలు పలికి నిజామాబాద్​కు తిరుగు ప్రయాణమయ్యారు.

నిద్రమత్తులో కారు ప్రయాణం

సుశీల్ కారు నడుపుతుండగా తెల్లవారు జామున నాలుగున్నర గంటలకు నిద్రమత్తు కారణంగా వాహనం అదుపు తప్పింది. అతి వేగం కారణంగా రోడ్డు పక్కన గల డివైడర్​కు తగిలి చెట్టును బలంగా ఢీకొట్టింది. కారులో ఉన్న నలుగురూ అక్కడికక్కడే మృతి చెందారు. పోలీసులు కుటుంబ సభ్యులకు సమాచారం అందించారు. ఘటన స్థలానికి వచ్చిన బంధువులు, తల్లిదండ్రులు కన్నీరు మున్నీరుగా రోదించారు. వారి ఆర్తనాదాలతో ఘటనా స్థలం మిన్నంటింది.

ఇద్దరు యువకులు మరణం

సుశీల్​ కుమార్​(21) ఆర్మూర్​లో మిషన్​భగీరథలో పని చేస్తున్నాడు. నవీపేట్​కు చెందిన ప్రశాంత్​(23) నిజామాబాద్​ నగరంలోని వినాయక్​ నగర్​లో తన తల్లిదండ్రులతో నివాసం ఉంటున్నాడు. బీటెక్​ పూర్తి చేసి ఓ హోటల్​లో రిసెప్షనిస్ట్​గా పనిచేస్తున్నాడు.

తల్లిదండ్రుల రోదన

సుశీల్​కుమార్​, ప్రశాంత్​ మృతదేహం వద్ద తల్లిదండ్రుల రోదన మిన్నంటింది. తమ జీవితాలకు బాసటగా ఉంటాడని అనుకుంటే తమకు అందనంత దూరం వెళ్లి పోయాడంటూ... విలపించారు. మంథని లావణ్య భర్త జనార్దన్​ గల్ఫ్​​లో ఉన్నాడు. లావణ్య, రోష్ని ఒకేసారి దూరం కావడంతో లావణ్య తల్లిదండ్రులు హతాశులయ్యారు.

ఒక ప్రమాదం మూడు కుటుంబాల్లో విషాదం నింపింది. కుటుంబ సభ్యుల రోదనలు చూపరులను కంటతడి పెట్టించాయి.

• ఇదీ చూడండి: దిల్లీఫైర్: కన్నీరు పెట్టిస్తున్న కార్మికుడి చివరి కాల్