గుత్తేదారు నిర్లక్ష్యం.. ఇంటిని కోల్పోయిన కుటుంబం

అసలే నిరుపేద కుటుంబం.. కుట్టుమిషన్​ తొక్కుతూ అరకొర సంపాదనతో కుటుంబాన్ని పోషిస్తున్న ఆ వ్యక్తి.. ఉన్న ఇల్లు కాస్తా నేల మట్టం కావడంతో రోడ్డున పడ్డాడు. కామారెడ్డి జిల్లా భిక్నూర్​ మండలంలో మురుగు కాలువల నిర్మాణ కాంట్రాక్టు చేపట్టిన గుత్తేదారు నిర్లక్ష్యంతో ఆ వ్యక్తి కుటుంబం వీధిన పడింది.

కామారెడ్డి జిల్లా భిక్నూర్ మండలం తిప్పపూర్ గ్రామానికి చెందిన శ్రీగాధ సిద్ధరామేశ్వర్ ఇల్లు శుక్రవారం నేలమట్టమైంది. అతని కుటుంబం వీధిన పడింది. రోజూ 17కి.మీలు ప్రయాణం చేసి కుట్టుమిషన్ తొక్కుతూ అరకొర జీతంతో కుటుంబాన్ని నెట్టుకొస్తున్న రామేశ్వర్​కు ఆ ఇల్లే ఆధారం. గ్రామంలో పారిశుద్ధ్య పనుల పేరుతో ఒక గుత్తేదారు మురికికాలువల నూతన నిర్మాణం చేపట్టారు.

ఈ క్రమంలో జేసీబీతో కాలువలు తీయించారు. కాలువలు తీయించి కొన్ని నెలలు గడుస్తున్నా వారు పట్టించుకోలేదు. దీంతో గ్రామంలో నుంచి వచ్చే మురుగు నీరు కాలువల్లో చేరింది. ఆ నీటి తేమ.. పక్కనే ఉన్న సిద్ధరామేశ్వర్ ఇంటి గోడలకు పట్టి ఒక్కసారిగా ఇల్లు కూలిపోయింది. అప్రమత్తమైన కుటుంబీకులు బయటకు పరుగులు తీశారు. ఇంటిని కోల్పోయిన బాధితుడు తమకు ఇల్లు కట్టిస్తే చాలని అధికారులను వేడుకున్నాడు.

ఇదీ చదవండి:వ్యవసాయేతర ఆస్తుల రిజిస్ట్రేషన్లకు మొరాయిస్తున్న సర్వర్లు