Priyanka Gandhi Election Campaign in Gadwal : తెలంగాణ ప్రజలు ఏ కలల కోసం రాష్ట్రాన్ని సాధించుకున్నారో.. బీఆర్ఎస్ పదేళ్ల పాలనలో ఆ కలలు కల్లలుగానే మిగిలాయని ఏఐసీసీ ప్రధాన కార్యదర్శి ప్రియాంక గాంధీ విమర్శించారు. కాంగ్రెస్ పార్టీని అధికారంలోకి తీసుకొస్తే.. ఆ కలలను సాకారం చేయడానికి చిత్త శుద్ధిగా కృషి చేస్తామని తెలిపారు. జోగులాంబ గద్వాల జిల్లా కేంద్రంలో నిర్వహించిన కాంగ్రెస్ విజయ భేరి బహిరంగ సభలో ఆమె పాల్గొని ప్రసంగించారు.
Congress Vijayabheri Public Meeting at Gadwal : ఈ సందర్భంగా తెలంగాణకు ఇప్పుడు అత్యంత కీలకమైన సమయం వచ్చిందని.. గత పదేళ్లలో బీఆర్ఎస్ ప్రభుత్వం ప్రజలను ఏ విధంగా మోసం చేసిందో ఆలోచించి నిర్ణయం తీసుకోవాలని ప్రియాంక ప్రజలను కోరారు. బీఆర్ఎస్ నాయకులంతా ఫామ్హౌస్‌లు కట్టుకొని విలాసవంతమైన జీవితాలు గడుపుతూ, ప్రజా సమస్యలను విస్మరించారని ఆరోపించారు. రాష్ట్రంలో ప్రతి ప్రాజెక్టు అవినీతిమయమైపోయిందని, ఈ అవినీతి ద్వారా బీఆర్ఎస్ నాయకులు రోజురోజుకూ ధనవంతులుగా మారుతున్నారని ధ్వజమెత్తారు.
ప్రజల సమస్యలు పట్టించుకునే పరిస్థితిలో బీఆర్ఎస్ ప్రభుత్వం లేదు : ప్రియాంక గాంధీ
విద్యార్థులు ఎన్నో సంవత్సరాలు కష్టపడి చదువుకుంటే.. ప్రశ్నాపత్రాలను లీక్ చేశారని ప్రియాంక ఆగ్రహం వ్యక్తం చేశారు. ల్యాండ్, సాండ్‌, వైన్‌, మైన్‌ మాఫియాలన్నీ రాష్ట్రంలో చెలరేగిపోయాయన్నారు. మళ్లీ అధికారంలోకి వస్తే ధరణి ద్వారా భూములు లాక్కుంటున్నట్లు ఇళ్లు కూడా లాక్కుంటారని ఆరోపించారు. ఈ క్రమంలోనే గద్వాల పక్కనే ఉన్న కర్ణాటకలో.. కొన్ని నెలల క్రితం కాంగ్రెస్ ప్రభుత్వం ఏర్పాటైందని ప్రియాంక గుర్తు చేశారు. అక్కడ హామీలుగా ఇచ్చిన 5 గ్యారెంటీలను అమలు పరుస్తున్నామని చెప్పారు. తెలంగాణతో పోలిస్తే కర్ణాటకలో పెట్రోల్, డీజిల్ ధరలు ఎంత ఉన్నాయో కనుక్కోవాలని సూచించారు.