మేడిగడ్డ బ్యారేజీ కరకట్ట మట్టి అక్రమ తరలింపు

కాళేశ్వరం ప్రాజెక్టులోని లక్ష్మీ (మేడిగడ్డ) బ్యారేజీ ఆనకట్టకు సంబంధించి కరకట్ట నిర్మాణాల మట్టిని అక్రమంగా కొందరు తరలించారు. గుట్టు చప్పుడు కాకుండా ఆ మట్టితో ఇసుక క్వారీల కోసం రహదారులు వేస్తున్నట్లు ఆరోపణలు ఉన్నాయి. ఈ విషయంపై పోలీసులకు ఫిర్యాదు చేసినట్లు మేడిగడ్డ బ్యారేజీ ఇంజినీరింగ్ అధికారి తెలిపారు.

రాష్ట్ర ప్రభుత్వం ప్రతిష్ఠాత్మకంగా నిర్మించిన కాళేశ్వరం ప్రాజెక్టులోని మేడిగడ్డ బ్యారేజీ కరకట్ట నిర్మాణాల మట్టిని కొంతమంది అక్రమంగా తరలిస్తున్నారు. గోదావరి తీర ప్రాంతం, సమీప గ్రామాల శివారు ప్రాంతాల్లో కరకట్టల నిర్మాణం కిలోమీటర్ల మేర ఉంది. ఈ నేపథ్యంలో ఆ ప్రాంతంలో పలు ఇసుక క్వారీలు సాగుతున్నాయి. గతంలో బ్యారేజీలో నీటి నిల్వతో క్వారీలను నిలిపివేయగా, మళ్లీ ప్రారంభించేందుకు సన్నాహాలు చేస్తున్నారు.

ఈ నేపథ్యంలో ఆ ప్రాంతంలోని కొందరు గుట్టు చప్పుడు కాకుండా కరకట్టల మట్టిని అక్రమంగా తవ్వి ఇసుక క్వారీలలో రోడ్ల నిర్మాణానికి ఉపయోగిస్తున్నారనే ఆరోపణలు ఉన్నాయి. ఆ ప్రాంతంలో మట్టి తవ్వకాల ఆనవాళ్లు బయటకు తెలియడంతో సంబంధిత వ్యక్తులు దిద్దుబాటు చర్యలు చేపట్టినట్లు సమాచారం. ఈ విషయంపై మహదేవపూర్​ పోలీసులకు ఫిర్యాదు చేసినట్లు మేడిగడ్డ బ్యారేజీ ఇంజినీరింగ్ అధికారి తెలిపారు.

ఇదీ చదవండి: కరోనా నుంచి కోలుకున్న అనిల్ రావిపూడి