'గణేశ్​ నిమజ్జనంలో ఎలాంటి అపశ్రుతి జరగొద్దు'

వినాయక నిమజ్జనం సందర్భంగా జిల్లాలో ఎలాంటి అవాంఛనీయ ఘటనలు జరగకుండా ఏర్పాట్లు చేయాలని జయశంకర్ భూపాలపల్లి జిల్లా కలెక్టర్ అబ్దుల్ అజీమ్ అధికారులను ఆదేశించారు. కలెక్టరేట్​లో సంబంధిత శాఖల అధికారులతో టెలికాన్ఫరెన్స్ నిర్వహించారు.

వినాయక నిమజ్జనానికి అన్ని ఏర్పాట్లు చేయాలని జయశంకర్ భూపాలపల్లి జిల్లా కలెక్టర్ అబ్దుల్ అజీమ్ అధికారులను ఆదేశించారు. ఇటీవల వర్షాలకు వాగులు, కుంటలు, చెక్​డ్యాంలు నిండుకుండలా మారినందున ఎలాంటి ప్రమాదాలు జరగకుండా చర్యలు తీసుకోవాలని సూచించారు. నిమజ్జనం వద్ద కరోనా నిబంధనలు పాటిస్తూ, తక్కువ మంది మాత్రమే నిమజ్జనంలో పాల్గొనేలా ప్రజలకు ముందస్తు అవగాహన కల్పించాలని తెలిపారు.

జిల్లా అదనపు కలెక్టర్ వై.వి.గణేశ్​తో సమన్వయం చేస్తూ సంబంధిత శాఖల అధికారులు కాళేశ్వరం, గణపురం, భూపాలపల్లి పట్టణంలోని చెరువుల్లో వినాయకులను నిమజ్జనం చేయడానికి అధికంగా వచ్చే అవకాశం ఉన్నందున ఆయా ప్రాంతాల్లో ప్రత్యేక ఏర్పాట్లు చేయాలని సూచించారు. క్రేన్లు, విద్యుద్దీపాలను ఏర్పాటు చేయాలని తెలిపారు. గణేశ్ ​నిమజ్జనం వద్ద గజ ఈతగాళ్లను అందుబాటులో ఉంచాలని జిల్లా మత్స్యశాఖ అధికారి భాస్కర్​ను, కాళేశ్వరంతో పాటు ముఖ్యమైన ప్రాంతాల్లో సింగరేణి రెస్క్యూ టీంను అందుబాటులో ఉంచాలని అధికారులను ఆదేశించారు.

అధికారులు సమన్వయంతో ముందస్తు ఏర్పాట్లు చేసి జిల్లాలో ఎలాంటి అవాంఛనీయ సంఘటనలు జరగకుండా ప్రశాంత వాతావరణంలో గణేష్ నిమజ్జనం పూర్తయ్యేలా ఏర్పాట్లు చేయాలని సూచించారు.

• ఇవీ చూడండి:హైదరాబాద్​ కంపెనీలో అమెరికన్ టీకా ఉత్పత్తి!