నిరుద్యోగ యువతకు స్వయం ఉపాధి, రుణాలపై అవగాహన కలిగేలా సదస్సులు నిర్వహించాలని భూపాలపల్లి శాసనసభ్యులు గండ్ర వెంకటరమణా రెడ్డి బ్యాంకర్లకు సూచించారు. జయశంకర్ భూపాలపల్లి జిల్లా కలెక్టరేట్లో జిల్లా స్థాయి బ్యాంకర్ల సమావేశం జరిగింది. ఈ కార్యక్రమానికి ముఖ్య అతిథిగా హాజరైన గండ్ర.. జిల్లా సంయుక్త కలెక్టర్ కూరాకుల స్వర్ణలతతో కలిసి జిల్లాలో ఆర్థికాభివృద్ధికి బ్యాంకులు తీసుకుంటున్న చర్యలపై సమీక్షించారు. నాబార్డ్ వారు 874.54 కోట్ల రూపాయలతో రూపొందించిన 2021- 2022 వార్షిక రుణ ప్రణాళిక బుక్లెట్ను విడుదల చేశారు.
రుణాలు సకాలంలో అందించాలి:
"నిరుద్యోగ యువత, రైతులు, మహిళల ఆర్థిక అభివృద్ధి కోసం రాష్ట్ర ప్రభుత్వం సబ్సిడీతో కూడిన అనేక పథకాలను ప్రవేశపెట్టింది. బ్యాంకర్లు ప్రభుత్వ సంకల్పానికి తోడ్పాటును అందించాలి. నిర్ధేశిత లక్ష్యం మేరకు రైతులకు పంట రుణాలు, స్వయం సహాయక మహిళా సంఘాల సభ్యులకు బ్యాంకు లింకేజీ రుణాలు సకాలంలో ఇవ్వాలి. వ్యవసాయ అనుబంధ రంగాలైన పాడి పరిశ్రమ, చేపల పెంపకం ద్వారా రైతులు అదనపు ఆదాయం పొందేలా రుణాలను సద్వినియోగం చేయాలి.
స్థానిక మార్కెట్లో డిమాండ్ ఉండే వస్తువుల తయారీ యూనిట్లను స్థాపించుటకు స్వయం సహాయక మహిళా సంఘాల సభ్యులకు రుణాలను అందించాలి. ఆహార ఆధారిత యూనిట్ల స్థాపన ద్వారా స్వయం ఉపాధి పొందేలా యువతకు రుణాలను ఇవ్వాలి. జిల్లాలో ప్రజలకు నాణ్యమైన పాలను అందించేందుకు పాడి గేదెల యూనిట్లను రైతులకు అందించేందుకు పశుసంవర్ధక శాఖ ద్వారా ప్రత్యేక శ్రద్ధ తీసుకోవాలి. "