చెల్లిని ప్రేమిస్తున్న యువకుడిని చంపిన అన్న

తన సోదరిని ప్రేమిస్తున్న ఓ యువకుడిపై యువతి సోదరుడు దాడి చేసిన ఘటన జనగామ జిల్లాలో జరిగింది. ద్విచక్రవాహనంపై వెళ్తున్న యువకుడిని ఆటోతో ఢీకొట్టి... కత్తితో దాడి చేసి పరారయ్యాడు. తీవ్రంగా గాయపడిన వ్యక్తిని ఆస్పత్రికి తీసుకెళ్లగా చికిత్స పొందుతూ మృతి చెందాడు.

చెల్లిని ప్రేమిస్తున్నాడని ఓ యువకుడిపై యువతి సోదరుడు కత్తితో దాడి చేశాడు. తీవ్రంగా గాయపడిన ఆ యువకుడు ఆస్పత్రిలో చికిత్స పొందుతూ ప్రాణాలు కోల్పోయాడు. జనగామ జిల్లా బచ్చనపేట మండలం కొన్నే గ్రామానికి చెందిన శ్రీధర్ కొంత కాలంగా... కోడవటూర్​కు చెందిన ఓ యువతిని ప్రేమిస్తున్నాడు.

విషయం తెసుకున్న యువతి సోదరుడు శివకుమార్​... తన చెల్లి వెంటపడొద్దంటూ శ్రీధర్​కు పలుమార్లు హెచ్చరించాడు. అయినప్పటికీ శ్రీధర్​ వినకపోవడం వల్ల... హతమార్చేందుకు పథకం వేశాడు. ద్విచక్రవాహనంపై బచ్చన్నపేటకు వెళ్తున్న శ్రీధర్​ను కొడవటూర్​ కమాన్​ వద్ద ఆటోతో ఢీ కొట్టాడు. కిందపడిపోయిన శ్రీధర్​పై కత్తితో దాడిచేసి పరారయ్యాడు. సమాచారం అందుకున్న పోలీసులు ఘటనాస్థలికి చేరుకుని తీవ్రంగా గాయపడిన యువకుడిని జనగామ ఆస్పత్రికి తీసుకెళ్లగా... చికిత్స పొందుతూ మృతి చెందాడు. హత్యకు పాల్పడిన శివకుమార్​ పోలీసులు సమక్షంలో లొంగిపోయినట్లు సమాచారం. డీసీపీ శ్రీనివాస్​ రెడ్డి ఘటనా స్థలికి చేరుకుని దర్యాప్తు చేపట్టారు.

ఇదీ చూడండి :మృతదేహాలను పరిశీలించిన మంత్రి ఎర్రబెల్లి