Crops Damage due to Hail Rains in Telangana: అకాల వర్షాలు.. వడగళ్ల వాన.. రైతులను కోలుకోలేని దెబ్బతీశాయి. కరీంనగర్ జిల్లా వ్యాప్తంగా కురుస్తున్న అకాల వర్షంతో.. రైతులు తీవ్రంగా నష్టపోయారు. వరి, మిరప, మామిడి, టమాటో తోటలు తీవ్రంగా దెబ్బతిన్నాయి. బీజేపీ కరీంనగర్ జిల్లా అధ్యక్షులు కృష్ణారెడ్డి దెబ్బతిన్న పంటలను పరిశీలించారు. సిద్దిపేట జిల్లా కొమురవెల్లి మండలంలో.. వరి పంట దారుణంగా దెబ్బతింది. ఐనాపూర్‌లో తెలంగాణ రైతు సంఘం నాయకులు పర్యటించి.. నష్టపోయిన రైతుల పంట రుణాలు మాఫీ చేయాలని డిమాండ్ చేశారు.
నేలరాలిన మామిడి, వరి.. లబోదిబోమంటున్న రైతులు: యాదాద్రి భువనగిరి జిల్లా మోటకొండూరు మండలంలోని ధాన్యం, మామిడి తోటలలోని మామిడికాయలు పూర్తిగా నేలరాలిపోయాయి. రైతుల బాధ వర్ణనాతీతంగా మారిపోయింది. మోత్కూర్ మండలంలో అకాల వర్షానికి.... వరి నేల రాలడంతో తీవ్ర నష్టం వాటిల్లింది. దాచారంలో ఏర్పాటు చేసిన ఐకేపీ ధాన్యం కొనుగోలు కేంద్రంలో... వర్షపు నీటికి పంట కొట్టుకుపోయింది.
ప్రభుత్వమే ఆదుకోవాలంటూ అన్నదాతల ఆవేదన: జనగామ జిల్లాలో అకాల వర్షాలు.. రైతులను నిండా ముంచాయి. జనగామ మండలం పెద్ద పహాడ్‌లో దెబ్బతిన్న పంటలను మంత్రి ఎర్రబెల్లి దయాకర్‌రావు, ఎమ్మెల్యే ముత్తిరెడ్డి యాదగిరి రెడ్డి పరిశీలించారు. అనంతరం కలెక్టర్‌ కార్యాలయంలో.. మంత్రి సమీక్ష నిర్వహించారు. అకాల వర్షానికి నష్టపోయిన రైతులకు ప్రభుత్వం వెంటనే నష్టపరిహారం చెల్లించాలని మాజీ పీసీసీ అధ్యక్షుడు పొన్నాల లక్ష్మయ్య డిమాండ్ చేశారు. జనగామ, సిద్దిపేట జిల్లాలో దెబ్బతిన్న పంటలను పొన్నాల పరిశీలించి.. రైతులను ఓదార్చారు. రాష్ట్ర ప్రభుత్వమే తమను ఆదుకోవాలంటూ... అన్నదాతలు ఆవేదన వ్యక్తం చేశారు.
రైతుల ఆందోళనకు ప్రతిపక్షాల మద్దతు: జనగామ జిల్లాలో బచ్చన్నపేట, జనగామ, రఘునాథపల్లి మండలాల్లో 42 గ్రామాల్లో వరి పంట దెబ్బతింది. బచ్చన్నపేట చౌరస్తాలో రైతులు రాస్తారోకో చేశారు. నష్టపోయిన ఎకరానికి 40వేల రూపాయలు నష్టపరిహారం చెల్లించాలని డిమాండ్ చేశారు. రైతుల ఆందోళనకు కాంగ్రెస్, బీజేపీ నాయకులు మద్దతు తెలిపారు. రైతులతో మాట్లాడేందుకు ఎమ్మెల్యే ముత్తిరెడ్డి యాదగిరి రెడ్డి అక్కడికి రావడంతో.. పీసీసీ మాజీ అధ్యక్షుడు పొన్నాల లక్ష్మయ్య అక్కడి నుంచి వెళ్లిపోయారు. బీజేపీ నాయకులు ఎమ్మెల్యేకు వ్యతిరేకంగా నినాదాలు చేయడంతో... స్వల్ప ఉద్రిక్తత చోటు చేసుకుంది.