కొనుగోలు కేంద్రాల్లో కనీస సౌకర్యాలు లేవు: బండి సంజయ్​

రైతులు పండించిన పంట చివరి గింజ వరకు కొనుకోలు చేస్తామంటున్న ప్రభుత్వం.. ఆ దిశగా చర్యలు తీసుకోవడం లేదని భాజపా రాష్ట్ర అధ్యక్షులు బండి సంజయ్​ ఆరోపించారు. జగిత్యాల జిల్లా తాటిపెల్లిలోని ధాన్యం కొనుగోలు కేంద్రాన్ని ఆయన సందర్శించారు.

జగిత్యాల జిల్లా తాటిపెల్లిలోని ధాన్యం కొనుగోలు కేంద్రాన్ని భాజపా రాష్ట్ర అధ్యక్షులు బండి సంజయ్​కుమార్​ సందర్శించారు. కొనుగోలు కేంద్రంలో కనీస సౌకర్యాలు లేవని ఆయన మండిపడ్డారు. ధాన్యం కొనుగోలు చేస్తారన్న నమ్మకం కూడా రైతులకు లేదని వ్యాఖ్యానించారు.

జిల్లాలో పంటనష్టం అంచనా వేసినా ఇప్పటివరకు ఒక్క రైతుకూ పరిహారం ఇవ్వలేదని సంజయ్​ ఆరోపించారు. రైతులు పండించిన ప్రతి గింజనూ కొనుగోలు చేస్తామంటున్న ఈ ప్రభుత్వం.. ఇప్పటి వరకు కొన్నది 14 లక్షల టన్నులే అని పేర్కొన్నారు. ధాన్యం కొనుగోళ్లపై మంత్రుల ప్రకటనల్లో పొంతన లేదని అన్నారు.