'ఎన్నికల కోడ్ రాకతో ఆ ప్రకటన ఆలస్యమైంది..!'

పసుపు బోర్డును మించిన ప్రత్యేక ప్యాకేజీని కేంద్ర ప్రభుత్వం ప్రకటించిందని నిజామాబాద్ ఎంపీ అర్వింద్ కుమార్ అన్నారు. తెలంగాణ రైతాంగం బాగుపడే నిర్ణయం కేంద్ర ప్రభుత్వం తీసుకుందన్నారు. మున్సిపల్ ఎన్నికల ప్రచారంలో భాగంగా... జగిత్యాల జిల్లా రాయికల్ మున్సిపాలిటీలో నిర్వహించిన ద్విచక్ర వాహన ర్యాలీలో ఆయన పాల్గొన్నారు.

మిషన్ భగీరథ, కాళేశ్వరం ప్రాజెక్టులకు డబ్బులు పెట్టామని మాట్లాడుతున్న అధికార మంత్రులు, ఎమ్మెల్యేలు మున్సిపాలిటీలను ఏ విధంగా అభివృద్ధి చేస్తారని ప్రశ్నించారు నిజామాబాద్ ఎంపీ ధర్మపురి అర్వింద్. మాజీ ఎంపీ కవిత, మంత్రి హరీష్ రావును పక్కన పెట్టి... మంత్రి కేటీఆర్ ఒక్కడే రాష్టాన్ని దోచుకుంటున్నారని మండిపడ్డారు. పౌరసత్వ చట్టానికి తెరాస మద్దతు ఇవ్వక పోయినా... రాష్ట్రంలో ఈ బిల్లు అమలౌతుందన్నారు. గత ఎన్నికల్లో హామీ ఇచ్చినట్లుగా పసుపు బోర్డు ఏర్పాటుకు కేంద్రం అంగీకరించిందన్నారు. ఎన్నికల కోడ్ వల్ల ఆ ప్రకటన రాలేదన్నారు.

రాయికల్ నూతన మున్సిపాలిటీ ఎన్నికల్లో నిలబడ్డ భాజపా 12 మంది అభ్యర్థులను గెలిపిస్తే... కేంద్రం నుంచి మరిన్ని డబ్బులు తీసుకువస్తానని హామీ ఇచ్చారు. ఈ సందర్భంగా... అర్వింద్​ను రైతులు ఘనంగా సన్మానించారు.

ఇవీ చూడండి: 'తెరాస మోసాలే... పుర ఎన్నికల్లో మన అస్త్రాలు'