బ్యాంకు అధికారులమంటూ ఫోన్​.. 3.49 లక్షలకు టోకరా

సైబర్​ నేరస్థులు రోజురోజుకూ రెచ్చిపోతున్నారు. సాంకేతికతను వినియోగించుకుంటూ ప్రజలను బురిడీ కొట్టిస్తున్నారు. వీరి ఉచ్చులో చిక్కుకుని ఎంతోమంది మోసపోతున్నారు. తాజాగా జగిత్యాల జిల్లాలో ఓ వ్యక్తి వీరి వలలో పడ్డాడు. రూ.3.49 లక్షలు సమర్పించుకున్నాడు.

జగిత్యాల జిల్లాకు చెందిన శ్రీనివాస్​ అనే వ్యక్తి ఓ శానిటరీ దుకాణంలో సామగ్రి కొనుగోలు చేశాడు. అందుకు సంబంధించిన బిల్లు రూ.3 లక్షల 49 వేలు ఈ నెల 13న ఆన్​లైన్​లో చెల్లించాడు. ఈ క్రమంలో ఆ సొమ్ము ఖాతాలోకి చేరకపోవటం వల్ల దుకాణాదారు... ఎస్బీఐ టోల్ ఫ్రీ నంబర్​కు ఫోన్ చేశాడు. నంబర్​ బిజీ రావటం వల్ల ఫోన్​ పెట్టేశాడు.

కొద్దిసేపటి తర్వాత బ్యాంకు నుంచి మాట్లాడుతున్నామంటూ ఓ ఆగంతకుడు ఫోన్​ చేశాడు. డబ్బులు ఖాతాలో జమ కావాలంటే ఓ యాప్​ డౌన్​లోడ్​ చేసుకోవాలని నమ్మబలికాడు. అతని మాటలు నమ్మిన శ్రీనివాస్​.. యాప్ డౌన్​లోడ్ చేసుకుని అతను చెప్పినట్లుగా ఖాతా వివరాలు, పిన్​కోడ్ నెంబరు యాప్​లో నమోదు చేశాడు.

ఇంత చేసినా శానిటరీ దుకాణానికి డబ్బులు చేరలేదు. అతని ఖాతాకూ తిరిగి డబ్బులు జమకాలేదు. ఫలితంగా బ్యాంకుకి వెళ్లి వివరాలు అడగ్గా.. డబ్బులు ఝార్కండ్​లోని ఓ బ్యాంకు ఖాతాకు జమ అయినట్లు అధికారులు వెల్లడించారు. మోసపోయానని గ్రహించిన శ్రీనివాస్​.. జగిత్యాల పట్టణ పోలీసులకు ఫిర్యాదు చేశాడు. ఈ మేరకు కేసు నమోదు చేసుకున్న పోలీసులు దర్యాప్తు చేస్తున్నారు.