తెలంగాణ అర్బన్‌ ఫైనాన్స్‌ ఇన్‌ఫ్రాస్ట్రక్చర్‌ డెవలప్‌మెంట్‌ కార్పొరేషన్‌ నిధులు రూ.3 కోట్లతో జగిత్యాల పట్టణంలోని ధరూరు వాగు నుంచి మంచినీళ్ల బావి వరకు డివైడర్లు, సెంట్రల్‌ లైటింగ్‌ నిర్మాణ పనులకు ప్రజారోగ్యశాఖ ద్వారా టెండర్లు పిలిచింది. అయితే తొలత రాతితో కూడిన డివైడర్లు, సెంట్రల్‌లైటింగ్‌, మధ్యలో ఎర్రమట్టితో మొక్కలు ఏర్పాటు చేసే విధంగా టెండరులో పేర్కొన్నారు.
అడుగడుగునా అవినీతే..
అనూహ్యంగా పాలకులు, అధికారులు కలిసి డివైడర్లకు సంబంధించిన నమూనాల్లో మార్పు చేసి.. కేవలం రెండు అడుగుల ఎత్తులో రాతికట్టడానికి బదులుగా సిమెంటుతో హడావుడిగా పనులు పూర్తి చేశారు. రోడ్డు వేసినప్పుడల్లా... డివైడర్లు మునిగిపోయే అవకాశం ఉంది. ఉమ్మడి కరీంనగర్‌ జిల్లాలోని అన్ని పట్టణాల్లో రాతి కట్డడాలు నిర్మించగా ఒక జగిత్యాలలో మాత్రమే డిజైన్‌ మార్చారు. హడావుడిగా చేపట్టిన డివైడర్ల నిర్మాణం.. నాసిరకంగా పూర్తిచేశారు. మొక్కల కోసం ఎర్రమట్టి కాకుండా చాలావరకు మొరం పోసి నింపేశారు. మొక్కలు సైతం గుత్తేదారు బయట కొనుగోలు చేయాల్సి ఉండగా హరితహారం మొక్కలు వినియోగించారనే ఆరోపణలున్నాయి. తొలిసారి నాటిన మొక్కల్లో చాలావరకు సంరక్షణ లేక ఎండిపోయాయి.