వడ్రంగి ప్రతిభ: కర్ర వినాయకుడు.. కష్టాలు తీర్చేనంట..!

పర్యావరణానికి హాని కలిగించకుండా కర్రతో వినాయకుడిని తయారు చేశాడు. అందంగా ముస్తాబు చేసి.. ఇంటి ఆవరణలో ప్రతిష్టించాడు. ఈ బొజ్జ గణపయ్యను చూసేందుకు ప్రజలు ఆసక్తి చూపిస్తున్నారు. పలువురు అతడి ప్రతిభను మెచ్చుకుంటున్నారు.

జగిత్యాల జిల్లా మెట్​పల్లి పట్టణంలోని చైతన్య నగర్​లో నివాసముండే సున్నం బ్రహ్మయ్య వడ్రంగి పని చేస్తూ కుటుంబాన్ని పోషించుకుంటున్నాడు. ఈ క్రమంలోనే పర్యావరణం పట్ల ప్రజల్లో అవగాహన కల్పించాలని వినూత్నంగా ఆలోచించాడు. కర్రతో గణపయ్యను తయారు చేసి.. అందరినీ ఆకట్టుకుంటున్నాడు.

ఎలా చేశాడంటే...

ఒక టేకు మొద్దును తీసుకొని.. దానికి ఎలాంటి అతుకులు లేకుండా.. అందమైన వినాయక రూపాన్ని తీర్చిదిద్దాడు. గణపయ్య ప్రతిమతో పాటు చేతిలో ఉండే లడ్డూ, ఎలుకను సైతం కర్రతోనే తయారు చేశాడు. భక్తులను ఆకట్టుకునేలా అద్దాల మేడను ఏర్పాటు చేసి.. అందులో గణపయ్యను ప్రతిష్టించాడు. బ్రహ్మయ్య ఇంటి ఆవరణలో వెలసిన ఈ కర్ర గణపతి భక్తులను ఎంతగానో ఆకట్టుకుంటున్నాడు.

ఈ గణపయ్యను చూసేందుకు పట్టణంలోని ప్రజలంతా ఎంతో ఆసక్తి చూపుతున్నారు. పలువురు బ్రహ్మయ్యను అభినందిస్తూ ప్రోత్సహిస్తున్నారు.

గత 10 సంవత్సరాలుగా నేను ఈ కర్ర గణపతిని ప్రతిష్టిస్తున్నాను. దీనిని తయారు చేయడానికి నాకు రూ.25 వేల ఖర్చు, 11 నెలల సమయం పట్టింది. ప్రతి సంవత్సరం గణపయ్యను కొలుస్తుండటం వల్ల మా కుటుంబం సుఖ సంతోషాలతో ఉంటోంది.-బ్రహ్మయ్య