Sharmila Fires on KCR and KTR : 'తెలివిలేనివారు కాంగ్రెస్ వారయితే.. ఆ పార్టీ ఎమ్మెల్యేలను కొన్న మీది అతి తెలివి కాదా చిన్న దొర' అని.. మంత్రి కేటీఆర్‌నుఉద్దేశిస్తూ వైఎస్‌ఆర్‌టీపీ అధ్యక్షురాలు వైఎస్ షర్మిల విమర్శలు గుప్పించారు. కాంగ్రెస్ నాయకులు చేతకాని వాళ్లనప్పుడు 2014లో వారిని కొన్న మీరు ఏంటని ప్రశ్నించారు. ఈ క్రమంలో 2018లో మరో 12మంది ఎమ్మెల్యేలను.. అధికారపార్టీ కొనుగోలు చేసిందని ధ్వజమెత్తారు. ప్రతిపక్ష లీడర్లు ఎన్నికల సమయంలోనే కనిపించే సంక్రాంతి గంగిరెద్దులు అయితే.. ఎన్నికలకు 6 నెలల ముందు నిద్రలేచే కుంభకర్ణుడు.. కేసీఆర్ అని వైఎస్ షర్మిల ఎద్దేవా చేశారు.
Sharmila Comments on KTR : రాష్ట్ర ప్రజలు మళ్లీ కేసీఆర్‌ను ఎందుకు ఆశీర్వదించాలో ఒక్క కారణం చెప్పాలని కేటీఆర్‌ను.. వైఎస్ షర్మిలప్రశ్నించారు. రూ.16,000 కోట్ల మిగులు బడ్జెట్ ఉన్న రాష్ట్రాన్ని.. రూ.5 లక్షల కోట్లు అప్పులకుప్పగా ముఖ్యమంత్రి మార్చారని విమర్శించారు. ప్రాజెక్టుల పేరు చెప్పి కేసీఆర్ కుటుంబం లక్ష కోట్లు కాజేసిందని ధ్వజమెత్తారు. ఇంటికో ఉద్యోగమని చెప్పి తొమ్మిది సంవత్సరాల్లో.. 65,000 ఉద్యోగాలే ఇచ్చినందుకు మళ్లీ అధికారం ఇవ్వాలా అని వైఎస్ షర్మిల నిలదీశారు.
కేసీఆర్ పాలనలో నిరుద్యోగం 100 రెట్లు పెరిగిందని వైఎస్ షర్మిల ఆరోపించారు. నిరుద్యోగ జాబితాలో.. ఆత్మహత్యల్లో నంబర్ వన్‌గా రాష్ట్రం ఉన్నందుకు బీఆర్‌ఎస్‌ను మళ్లీ ఎన్నుకోవాలా అని ప్రశ్నించారు. రెండు దఫాలుగా లక్ష ఇండ్లు కట్టలేని మీరు.. తిరిగి పేదలను ఉద్ధరిస్తామని చెప్తే నమ్మాలా? అని అన్నారు. ధరణి పేరు చెప్పి భూములు లాక్కున్నారని ఆక్షేపించారు. వడ్లు కొనడం లేదని కేంద్రం మీద నెపం నెట్టి.. రైతుల చావులకు కేసీఆర్ కారణమయ్యారని వైఎస్ షర్మిల విమర్శించారు.