YS Sharmila fire on CM KCR: విద్యార్థుల కోసం ప్రతిపక్షాలన్నీ ఒక్కటై.. రాజకీయాలకు అతీతంగా పోరాటం చేయాలని వైఎస్ఆర్ తెలంగాణ పార్టీ అధ్యక్షురాలు వైఎస్ షర్మిల పిలుపునిచ్చారు. ప్రతిపక్షాలు అన్నీ కలిసికట్టుగా ఒకతాటిపై వచ్చి ఒక్కటిగా పోరాటం చేస్తే దేశమంతా చూస్తుందని ఆమె పేర్కొన్నారు. రాష్ట్రంలో నిరుద్యోగం తాండవం చేస్తుందని అభిప్రాయపడిన ఆమె.. సీఎం కేసీఆర్ ఏ ఏడాదికి ఆ ఏడాది ఉద్యోగ నోటిఫికేషన్ ఇస్తే నిరుద్యోగ సమస్య ఇంతలా ఉండేది కాదని అన్నారు.
ఐఎంఐఎ సంస్థ రిపోర్ట్ ప్రకారం.. దేశం మొత్తం మీద ఉన్న నిరుద్యోగంతో పోలిస్తే తెలంగాణ రాష్ట్రంలో 2 శాతం అధికంగా నిరుద్యోగం ఉందని పేర్కొన్నారు. బిస్వాల్ కమిటీ సూచన ప్రకారం రాష్ట్రంలో 1.90 లక్షల ఉద్యోగాలు భర్తీ చేయాలని డిమాండ్ చేశారు. అసెంబ్లీ సాక్షిగా 80 వేల ఉద్యోగాలు భర్తీ చేస్తానని చెప్పిన సీఎం కేసీఆర్.. 33 వేల ఉద్యోగాలకు నోటిఫికేషన్స్ ఇచ్చారని మండిపడ్డారు. అందులో 8 వేలకు మాత్రమే పరీక్షలు జరగగా.. అందులో లీకులతో విఫలమయ్యారని ఆరోపించారు.
ఏప్రిల్ 10న కామన్ ఏరియాలో కూర్చొని నిర్ణయం తీసుకోవాలి: ఎన్నికల మేనిఫెస్టోలో ఇంటికో ఉద్యోగం.. నిరుద్యోగ భృతి ఇస్తామన్నారని.. కానీ ప్రభుత్వం ఏర్పడిన తరువాత కేసీఆర్ కుటుంబంలో ఐదుగురికి ఉద్యోగాలు ఇచ్చారని ఎద్దేవా చేశారు. తొమ్మిది ఏళ్ల పాలనలో ఎన్ని గ్రూప్-1 ఉద్యోగాలు భర్తీ చేశారని ప్రశ్నించిన ఆమె.. తెలంగాణ యువకులు గ్రూప్-1 ఉద్యోగాలు చేయకూడదా అంటూ దుయ్యబట్టారు.
ఈ మేరకు రాష్ట్రంలో ఉన్న ప్రతిపక్ష పార్టీలన్నీ ఏప్రిల్ 10న ఒక కామన్ ఏరియాలో కూర్చొని ఈ విషయంపై చర్చించుకోవాలని సూచించారు. నిరుద్యోగ సమస్యలపై ఉమ్మడిగా పోరాటం చేయాలని పిలుపునిచ్చారు. దీనికి ఆచార్య కోదండరాం, లేదా మరొకరు నాయకత్వం వహించినా తనకు అభ్యంతరం లేదన్నారు. టీఎస్పీఎస్సీని ప్రశ్న పత్రాలు అమ్మే అంగడిగా మార్చారని ఆరోపించారు. డ్రగ్స్, నయీం, జూబ్లీహిల్స్‌ అత్యాచార కేసుల్లో దోషులను ఇప్పటివరకూ తేల్చని సిట్‌పై ప్రజలకు భరోసా ఎలా ఉంటుందని ప్రశ్నించారు.
"విద్యార్థుల కోసం ప్రతిపక్షాలన్నీ ఏకంగా పోరాడతాం.. రాజకీయాలకు అతీతంగా పోరాటం చేద్దాం.. ఏప్రిల్ 10న ఒక కామన్ ఏరియాలో కూర్చొని మాట్లాడుకుందాం. ప్రతిపక్షాలను బతకనిస్తున్నారా మీరు..? ఇంత వరకు ఎన్ని సిట్లు వేశారు? ఎంత మంది దోషులను శిక్షించారు. తెలంగాణ వచ్చిన తరువాత ఇంత వరకు ఎన్ని గ్రూప్-1 నోటిఫికేషన్లు ఇచ్చారు? తెలంగాణను పోరాడి తెచ్చుకున్న యువత ఇక్కడ ఉద్యోగాలు చేయకూడదా..?"- వైఎస్ షర్మిల